Gwen Zamora shrugs off 'live-in' rumor with boyfriend

Huling araw na bukas, June 20, ng panghapong-serye na Innamorata, na ipinagmamalaki ng Kapuso network dahil sa mataas na rating nito. In fact, nabigyan ito ng mahabang extension.

Si Gwen Zamora ang kontrabidang si Alejandra sa serye kaya ang tanong agad namin sa kanya, nagustuhan ba niya ang ending para sa kanyang karakter?

Nakangiting sagot ng dalaga, “To be honest, she did deserve the ending, galing sa akin, she deserves the ending. Pero magugulat kayo sa ending.”

Dati nang nai-report na papasok si Kylie Padilla sa final episode ng Innamorata. May koneksiyon ba ito sa karakter niya?

“Basta magandang ending pa rin, fairytale ending.”

Nag-enjoy daw si Gwen sa paggawa ng nasabing serye.

Aniya, “To be honest, ito ang pinakamasayang set na pinagtrabahuhan ko, aside sa Bubble Gang, given na yun. Pero ito ang soap na umiiyak ako sa last day namin.

“Ito yung dynamics namin, super nice na sana, yung next soap ko, sila pa rin ang kasama ko. Kahit sila Direk, nagkikita kami tuwing weekend, we became super close.”

Si Don Michael Perez ang direktor ng afternoon soap.

Dugtong pa niya, “At the same time, na-enjoy ko rin ang character ni Alejandra kasi iba talaga siya sa mga roles na nagawa ko.”

Napag-usapan ang Hollywood movie ni Angelina Jolie na Maleficent. Sigurado raw na hindi ganoon ang klase ng ending ng karakter ni Alejandra.

Napanood niya raw ito, medyo nabagalan siya pero hangang-hanga at gandang-ganda siya kay Angelina.

Naitanong namin kung pangarap din ba niyang gampanan ang ganoong klase ng karakter?

Sagot ni Gwen, “Oo, pero, ang hirap…parang ang hirap.  Looks-wise, baka hindi ko kaya pero baka naman acting-wise, puwede.”

NEXT PROJECT. Sa susunod niyang serye, mas gugustuhin ba niyang kontrabida muli ang karakter niya?

“To be honest, I want something different. Sana ma-exert ko naman ang craft ko. Hindi rin puwedeng same character kasi mabu-bore rin ang mga tao sa akin. Mabu-bore rin ako.”

Ano pala ang gusto niyang gawin kung siya ang masusunod?

“Neutral role, yung hindi siya kontrabida, hindi siya bida.”

Nagulat naman si Gwen nang sabihin naming meron siyang “strong personality."

“Really?” natatawang tanong niya.

Hindi siya naniniwala?

“I don’t know, maybe I’m just being humbled,” natawang sabi niya.

“Well, kontrabida’s fun because I know I can do a lot. The thing is I don’t know if I can play nice in the long period of time, like of Max Collin’s character, that would be a challenge for me.

“It would be nice to do something different naman.”

Ang inaabangan ni Gwen sa ngayon ay ang gagawin niyang pelikula sa Indonesia.

Ayon sa kanya, “I’m doing a movie there. My role, anti-hero na writer, boxer, so at least, iba ‘to. I’m gonna be doing action scenes.”

Parehong Skylar ang producer ng upcoming movie niya at ng The Witness, isang action-horror film na ipinalabas noong 2012.

Komento namin, mukhang nagustuhan siya ng mga taga-Indonesia?

“I guess,” nakangiting sabi niya.

FILMING IN INDONESIA. Umalis na si Gwen noong isang linggo para sa training niya sa pelikula.

Pero sa ngayon, magbabakasyon muna raw siya sa Europe ng isang buwan kasama ang boyfriend na si Raymund Romualdez.

Pagdating niya, diretso na raw siya sa Indonesia para i-shoot ang pelikula.

Enjoy bang gumawa ng pelikula sa Indonesia?

“Yeah, kasi lahat ng ginawa ko sa Indonesia, movie, e. It feels nice kasi, hindi kagaya ng nagmu-movie ako rito, sabay taping, sabay lagare. Doon kasi, it’s all in that movie.

“For one month, every day, yun lang, shooting lang. That’s all I breathe. That’s all I feel. Kasi, mahirap kapag dito nagmu-movie, nagse-segue, nahihirapan sa schedules.

“Pero siyempre, masaya pa rin ang nagaganap dito. Different experience. And I guess, every time I go to Indonesia, I came back a stronger person.”

Kung dati raw, nag-audition pa siya para sa The Witness, ngayon daw, talagang inalok na siya para sa bago niyang pelikula.

Paano kung alukin siya na sa Indonesia na mag-artista?

“Well, no, I wouldn’t live there. I have too much here. Mami-miss ko ang boyfriend ko, trabaho ko, friends ko. Mami-miss ko ang aso ko, parents ko, ang dami kong mami-miss.

“Puwede namang fly in, fly out. I’ve reached a point in my life na I can’t move country to one another, gusto ko sa isang country na lang talaga. Kasi I grew up moving from country to country.

“It’s a good experience, yes, it made you stronger, pero, sad.”

LOVELIFE. Limang taon na rin daw simula nang mag-stay si Gwen sa bansa.

At  ang una raw niyang binili ay aso nang gawin siyang modelo ng Belo Medical Group.

Katuwiran ng dalaga, “Sabi ko, now that I have a dog, hindi na ako puwedeng umalis. I have to live here.

“You know, it gives me reason, my security blanket . And the rest of the money, binigay ko sa parents ko.  I just want to get a dog. My dog’s name is Cholo, he’s a Shih Tzu.”

Biniro namin si Gwen, sino ang mas mahal niya, ang dog niya na si Cholo o ang boyfriend?

“I can’t compare,” ang natawang sabi niya.

“Pero you know, he loves my boyfriend also. Paminsan, hinihiram siya ng boyfriend ko. Kasi, my boyfriend lives alone. So, sasabihin niya, can Cholo sleep over? Okay…”

May mga balitang live-in na sila ng boyfriend, hindi pala totoo?

“No,” saad niya.

Ayaw niya ng ideya na live-in muna?

“No naman, it’s just that I live with my parents now.”

Hindi siya niyayaya ng boyfriend?

“Not yet, kasi now, we’re trying to save money as much as possible for the future. So by living with our parents, it saves us money.”

Kung nag-iipon na sila, may plano na silang magpakasal?

“Hmmm, wala pa. We’re focusing on now.”

Hindi pa ba nagpu-propose?

“No! Hello, kung nag-propose na sa akin, I will let the world know. I will have the diamond in my finger.”

Paano kung mag-propose sa Europe tour nila?

“No,” saad niya.

Dugtong din niya, “I don’t think we’re both ready for that to happen yet. And if he is, I guess, I could be.

“I think, we’re both ready pero, you want to be financially-ready. Ayaw mo namang magtipid sa wedding mo, ‘di ba?”

Gusto ba niya ng isang engrandeng kasalan?

“Me, to be honest, I just want a small wedding. But if I do get married to him, siguradong…Well, yeah, I can be happy with small wedding.”

Si Raymund Romualdez ay anak ng Tacloban Mayor na si Alfred Romualdez.

Kumusta siya sa mga magulang ni Raymund?

“I’m really close to his Mom. We have dinner together like me and his Mom lang.

His Mom, she’s a sweetheart to talk to. She’s the one that we always run to if we have problem.  She always know how to talk to us, whenever may problem kami.

“And even my parents loves him. His mom and my parents are super close. Noong Christmas, my parents spent Christmas with them in Tacloban, with Tita Cristina [Romualdez], too.”

Close rin siya kay Cristina?

“Whenever they are here, we always eat out. We go to Tagaytay and Baguio before Yolanda happened.” -- Rose Garcia, PEP