Umento sa pletihan gihangop sa mga drayber

CEBU CITY, Philippines - Gihangop sa transport sector sa Sugbo ang bag-ong umento sa pletihan, apan dayag sa tanan nga kalbaryo na usab kini sa mga pasahero. Mga taxi drayber nalipay sa umento nga P10, apan adunay kabalaka nga ilang gibati tungod kay magnihit na unya ang mag-taxi sa kamahal sa pamasahe. Bisan og 80 porsiento sa mga taxi units na-convert na sa LPG, apektado gihapon ang ilang pangita sa mga tsuper gumikan sa walay puas nga oil price hike. Atol sa closed door meeting sa City Traffic Operations Management (CITOM) board niadtong Martes sa buntag, adunay gisugyot nga laing pamaagi sa sistema og pletehan sa pangpublikong sakyanan. Gituki ang P2 matag kilometro nga pletehan sa public utility jeepney (PUJ). Nagpasabot nga kun usa lang ka kilometro ang biyahean sa pasahero P2 ra ang iyang i- plete Hinuon miangal ang mga driver sa maong sugyot. Gusto sab ni Mayor Tomas Osmeña nga tun-an pa gyud ang maong plano ug siguraduhon nga makiangayon alang sa mga driver ug sa pasahero. Kun mahan-ay na ang pagtuon ilang kining iduso sa Department of Transportation and Communication. Matod ni Nigel Paul Villarete, city planning development officer, gitun-an na usab nila ang pagputol sa ubang mga rota sa PUJ tungod kay nagsapaw na kini sa ubang mga rota. Ilang nasuta,nga matag tuig adunay bag-ong rota nga madungag hinungdan nga magdasok ang mga sakyanan sa usa ka rota, hinungdan nga mohout ang dagan sa trapiko. Kon putlon na ang mga rota sa pujs, mas makadaginot na ang mga drivers sa gasoline, matod pa. - Balitang Bisdak