Senador tutol sa Unified Contract Scheme ng Saudi Arabia

MANILA – Tinutulan ni Senate President Pro-Tempore Jinggoy Estrada nitong Biyernes ang Unified Contract Scheme na nakatakdang ipatupad ng Saudi Arabia dahil magreresulta ito sa karagdagang gastusin sa mga overseas Filipino workers (OFWs). Sa pahayag, hiniling ni Estrada sa Department of Foreign Affairs at Department of Labor and Employment na muling rebyuhin ang naturang bagong patakaran. “Nangangamba tayo na madadagdagan ng gastusin ang ating kababayan kapag ipinatupad ang bagong sistema at maaaring tumagal ang pagproseso sa deployment ng OFWs sa Saudi Arabia," ayon kay Estrada, chairman ng Senate committee on labor and employment. Ikinukonsidera ng senador na anti-labor ang naturang bagong sistema at labag sa umiiral na batas sa Pilipinas at international laws hinggil sa migration at overseas employment. Nakatakdang ipatupad ng Saudi government ang naturang scheme sa Setyembre 1, 2008. Ang lokal na recruitment agency na hindi makatutugon sa sistema ay mahihirapang makakuha ng visa para sa ipadadalang OFWs. Sa ilalim ng bagong sistema hindi na maaaring direktang makikipag-kasundo ang local recruitment agency sa employer sa Saudi Arabia. Kailangan dumaan sila sa recruitment agency na miyembro ng Saudi National Recruitment Committee (Sanarcom). “Sinusuportahan natin ang apela ng Philippine Association of Service Exporters Inc., (PASEI) sa DOLE at DFA na magpadala ng note verbal sa Saudi Arabian Embassy upang ipagpaliban ang implementasyon ng Unified Contract Scheme," ayon kay Estrada. - GMANews.TV