‘Hot timber’ ginkumpiska sa banwa sang Janiuay

ILOILO CITY, Philippines - Isa ka truck nga troso gin-impound sang mga awtoridad sang banwa sang Janiuay bangud wala ang drayber sini maipakita nga permit. Ginpakamaayo sg mga kapulisan sang banwa nga imbitaron sa police station sanday Ronnie Arcenal, 42, sang barangay Capangyan, Lambunao kag kaupod sini nga si Romeo Lactupo, pagkatapos nga nakit-an nga indi lamang expired kundi tampered pa ang mga permit sini angot sa kahoy nga ila ginakarga. Na-intercept ang truck sang mga police kag mga miyembro sa Task Force Bantay Kalikasan mga las-10 gab-i sang Huwebes sa bahin sang barangay Crispin Salazar North , Janiuay. Didto kag nadiskubrihan ang dugang nga kulang nga mga papeles sing duha. Suno sa community environment and natural resources officer sang banwa, Hulyo 21 sang gin-issue ang ulihi nga permit sa ila. Igapaidalum sa administrative proceedings kag maid-id nga imbestigasyun ang paglapas nga gintuga ni Arcenal. Gymlina, Mahogany kag Acacia lamang ang mga sahi sang kahoy ang sakop sa permit ni Arcenal, apang dugang nga nangin kwestyunable amo nga nadiskobrihan nga may yara pa ini sing bitbit nga bangkal – sahi sang kahoy nga natural-grown kag mabaskog nga ginpangdili ang pag-utod sini. Apang suno kang Arcenal, wala lang sini naintindihan ang nagakadapat nga proseso. - Ratsada