Identikits sa ‘cop killers’ sa Davao gipagula

DAVAO CITY, Philippines - Mipagula na ang mga pulis sa identikit sa duha ka mga suspek sa pagpamusil patay sa usa ka pulis ug barangay police didto sa Diversion Road, Panacan dinhi ning dakbayan di pa lang dugay. Ang usa gihulagway nga payat, 5’8" ang gitas-on ug gibana-banaang 37 anyos. Giingong kini mismo ang nipusil kang SPO1 Romeo Rivera, Martes sa kaadlawon. Ang ikaduhang suspek, kinsa maoy nipusil sa barangay police nga si Rey Cabagi, gihulagwayng tama-tama lang ang gidak-on, mga 35 ang pangidaron ug 5’5" ang gitas-on. Blangko pa kuno ang kapulisan kung unsa ang motibo sa krimen, apan wala nila gipadaplin ang anggulong personal nga bangi o may kalabutan sa trabaho ang ugat-hinungdan sa pagpamusil sa mga biktima. Nagpabilin pa sa hospital ang tambalanan ang laing barangay police nga si Raymund Bahada, kinsa naangol sa pag-atake. Gipulong na ni Mayor Rodrigo Duterte ang tanang station commanders sa kapulisan aron papaspasan ang imbestigasyon sa kaso. Mituo si Duterte nga madakpan ra gayud ang mga suspek. Gimanduan niini ang tanan station commanders nga pahugtan pa ang seguridad sa ilang mga area. Gisiguro sa alkalde nga mahatagan ug tabang pinansyal ang pamilya sa namatay nga pulis. Gihagit ang PNP sa kabanay sa pulis nga namtay nga sulbaron ang maong krimen. dili kuno tiaw ang serbisyong gihatag ni SPO1 Rivera sulod sa 22 katuig. Ikaduha na kuno kining higayon nga nadisgrasya kini, apan ang pinakapait tungod karon, nakalas na gayud ang iyang kinabuhi. Unang aksidente nga nasinati ni Rivera mao ang pagpamomba sa sasa wharf diin halos maputol ang tiil niini ug mabuta siya tungod sa igo sa bomba. Police on duty usab siya niadtong higayona. - Testigo