Partidong Kampi, Lakas 'di magkasundo sa Cha-cha

MANILA – Hindi magkasundo ang mga kaalyado ni Pangulong Gloria Macapagal Arroyo sa Kamara de Representantes kaugnay sa isinusulong na pag-amyenda sa Saligang Batas. Sa pulong balitaan nitong Miyerkules, nais ni Cebu Rep. Antonio Cuenco, kasapi ng Lakas-CMD, na aprubahan ng Kongreso ang inihain nitong resolusyon na nagtutulak ng Constitutional Convention (Con-con) na paraan na gagamitin sa pagpapalit ng Saligang Batas. Samantala, nais naman ni Sorsogon Rep. Jose Solis, kasapi ng partidong KAMPI, na suportahan ng Kamara ang resolusyon na inihain ni Camarines Sur Rep Luis Villafuerte para sa pagpapatawag ng Constituent Assembly (Con-Ass). "I would urge the leadership of the House, the committee on rules to schedule already for plenary decision the mode of amendment, whether Concon or via Constituent assembly, before the Christmas break. Let's vote on it on the floor," ayon kay Cuenco. Nakapaloob sa Concon ni Cuenco na isabay sa Mayo 7, 2010 presidential elections ang paghalal ng mga delegado (75 kasapi). Dapat simulan ng mga delegado ang kanilang pag-amyenda sa Konstitusyon sa Hunyo 2010 at kailangan tapusin nila ito sa loob ng isang taon. Isasalang naman sa plebisito upang aprubahan ng mga Filipino ang ginawa ng Concon sa Nobyembre 7, 2011. Ngunit ayaw isuko ni Solis ang resolusyon na inihain ni Villafuerte para magpatawag ng Con-ass ang Kamara at Senado dahil pinirmahan na umano ito ng 167 kongresista. "I will move for the Con-ass (resolution) to be decided already in the plenary next meeting. I don't care what modality (of amending the charter) would be adopted in the end. Whatever the decision is, let's support it," pahayag ni Solis. Samantala, pinayuhan ni Quezon Rep. Danilo Suarez, ang mga nag-organisa ng anti-chacha rally sa Biyernes na bantayan ang mga dadalo sa protesta at tiyaking hindi mapapasok ng mga nais maghasik ng gulo. Ang pahayag ay ginawa ni Suarez kasabay ng panawagan sa oposisyon na itigil ang pag-akusa sa administrasyon na nais isabotahe ang gagawing kilos protesta sa Makati City. “They should help ensure the security and protection of the rally participants against possible saboteurs who might infiltrate their ranks to intentionally put the government in a bad light if something untoward happens during the event. Let’s hope and pray that the interfaith rally will be as peaceful as those in the past," ayon sa kongresista. - GMANews.TV