Biktima sa pabuto sa Pasko mikunhod sa Central Visayas

CEBU CITY, Philippines - Gihulagway sa Department of Health nga nimenos karong tuiga ang biktima sa pabuto sa Pasko. Sa talaan sa Regional Epidemiology and Surveilance Unit kun RESU 7 adunay 26 ka mga kaso nga biktima sa pabuto tibuok Region 7 (Central Visayas). Kini nagsugod disyembre 19 hangtud petsa-25. Matud ni Dr. Expedito Medalla, 50 porsiento ang pag-us-os sa mga kaso sa mga nabiktima sa pabuto. Sa niaging tuig atol sa pagsugat sa Pasko, moabot 54 ka mga kaso ang natala. Ang Cebu City Medical Center adunay lima ka mga biktima, susama usab sa Vicente Sotto Memorial Medical Center. Tag-duha usab ang biktima nga nalandig sa mga district hospital Mandaue ug Lapu-Lapu. Tag-duha usab sa doctors hospital sa Cebu ug Mactan. Ang Chonghua Hospital adunay tulo samtang ang Velez adunay usa. Ang Ramiro Community Hospital adunay usa samtang tulo ang natala sa Gov. Celestino Gallares memorial hospital. Nagpangidaron og 89 anyos ang pinakatiguwang nga nabiktima samtang 4-anyos ang pinakabata. Kasagaran nakahiagum og paso sa kamot og eye injuries. Aduna usay natala nga naputlan og tudlo didto sa Bohol. Nanghinaut ang DOH nga moubos usab ang mga biktima sa pabuto atol sa pagsugat sa Bag-ong Tuig. - Balitang Bisdak