Depositors sa Legacy group naghugop sa bangko

CEBU CITY, Philippines - Sayo pa lang sa Mierkules sa buntag naghugop na ang mga depositor sa Legacy group didto sa Rural Bank of Liloan. Kini maoy unang adlaw sa pag proseso sa ilang claim, subay sa schedule nga Pebrero 13 nga gilatid sa Philippine Deposit Insurance Company kun PDIC. Apan gitataw sa PDIC nga ang unang batch pa lang ang ilang mahatagan og kwarta, ug kadto ra pong mga kliyente nga dunay P100,000 paubos nga deposito. Nabalaka ang mga depositor nga duna lay tag-usa ka ID nga gihuptan nga dili sila makakobra sa ilang kwarta. Nalatid sa rekisito sa PDIC nga kinahanglang dunay duha ka valid IDs ang mga mo-claim. Si Melchor Seno, usa ka mag-uuma, voters ID ra, matod pa, ang gihuptan nga identification ug wa masayod kon unsay alternatiba sa iyang sitwasyon. Apan gipadayag sa PDIC nga gihan-ay pa sa ilang ulohang buhatan kon unsaon pag-address ang naasoy nga problema. Samtang naabtan sa GMA News ang mga depositor sa Rural Bank of Subangdako, Mandaue aron pagproseso unta sa ilang claims. Apan wa pay taga-PDIC nga mipatim-aw sa paghatod ning balita. - Balitang Bisdak