VECO mopatuman og umento sa power rate sa Abril

CEBU CITY, Philippines - Giuyunan sa Energy Regulatory Commission (ERC) ang application sa National Power Corporation (NPC) sa umento sa bayranan sa kuryente sugod karong buwana. Subay niini, patas-an na sa Visayan Electric Company (VECO) ang rate sa ilang kuryente. Sa gipatawag nga press conference sa VECO, gipahibaw niini nga aduna nay provisional approval ang ERC sa NPC application. Mokabat P1.1460 per kilowatt hour ang ipatong sa NPC sa mga distributor sa Kabisay-an. Mas mahal ang power rate sa Kabisay-an itandi sa Luzon nga moumento lang og P0.4682 per kilowatt hour, samtang P0.7147 ang sa Mindanao. Kun ang usa ka panimay makagamit og 176 kWh matag buwan, makabayad sila og 1,127 pesos. Naglangkob lang kini sa paggamit og usa ka television set, electric fan ug suga. Apan tungod sa umento, mokabat na sa P1,326 ang ilang bayranan. Dul-an P200 ang diperensya. Gitino hinoon sa VECO nga inay P1.1460 ang ilang ipatong matag kWh, mokantidad lang og P0.9346 per kWh ang umento. Tungod kay 72 porsyento lang ang supply sa kuryente nga ilang gikuha gikan sa NPC. Gawas sa mga panimay, apektado usab ang mga patigayon. Provisional pa lang hinoon ang umento sa kuryente. Karong Huwebes ipahigayon ang hearing sa ERC aron tukion ang rates adjustment. Gitagalan og usa ka tuig ang ERC aron desisyonan ang final rates adjustment nga bugtong ang ERC lang modesisyon. - Balitang Bisdak