Sundalo gipatay human sa haya sa anak ni Parago

DAVAO CITY, Philippines - Usa ka adlaw human ang lamay sa anak ni New People’s Army Commander Leoncio Pitao, alyas Kumander Parago nga si Rebelyn Pitao, usa ka sundalo gipusil patay sa Paquibato ning dakbayan. Niuli lamang sa Paquibato si Sgt. Reynaldo Avanceña, personahe sa 55th engineering battalion sa Zamboanga, aron kuno patukuran og balay ang asawa niini. Apan niadtong March 16, gipusil patay kini sa duha ka mamumunong naka-motorsiklo. Natusak-tusak sa bala lawas sa biktima hinungdan sa hinanaling kamatayon niini. Ang asawa niini, halos dili ma-istorya sa gma news tungod sa kaguol. Kapulisan padayon ang imbestigasyon ug sa pagsusi sa kung kinsa gayod ang mamumuno. Sa pagkakaron, midumili na ang asawa sa biktima nga mobalik pa sa Paquibato. Wala usay kumpirmasyon o panghimakak kun ang pagpatay maykalambigitan sa kasong pagdagit ug pagpatay sa anak ni Kumander Parago. Nakasugnod sa kahadlok sa mga residente sa Paquibato and nahitabo kang Avanceña. Dungang pa, ni saad si Mayor Rodrigo Duterte nga dili manghilabot sa maong hitabo. Sa kasamtangan, mokabat na sa P500,000 ang ganting gitanyag sa gobyerno alang kang bisan kinsang makatudlo sa utok sa brutal nga pagpatay kang Rebelyn. Aminado ang mga pulis nga naglisod gayud sila sa pagtumbok sa mga criminal. Busa aron mas mapadali ang dagan sa imbestigasyon, gipatas-an na ang tanyag. Gitudlo kuno sa pamilya Pitao ang upat ka mga sakop sa Military Intelligence Group nga maoy suspek, apan dili kuno kini igong basehan ilabina nga wala silay mahatag nga testigo ug ebidensya. Samot kuno nga naglisod ang Task Force Rebelyn sa ilang imbestigasyon, ilabina nga hangtud karon, padayong nagpakahilom ang pamilya Pitao. Gikatakdang ihatod ngadto kang Kumander Parago ang abo ni Rebelyn didto sa kabukiran apan kini padayon pa kunong giplanuhan sa nahisgutang pamilya tungod ila usab kunong gikonsidera ang ilang seguridad. - Testigo