De los Angeles, iba pang opisyal ng Legacy group kinasuhan ng syndicated estafa

MANILA – Sinampahan ni Sen. Manuel Roxas III at mga plan holders ng nagsarang Legacy Consolidated Group nitong Miyerkules ng kasong syndicated estafa sa Makati City Prosecutor’s Office ang may-ari ng kumpanya na si Celso De los Angeles. Sa 20 pahinang joint complaint-affidavit, nagkaisa ang pitong planholders na sina Lolita S. Duria, Arlene Basco, Jovita Calleja, Corazon B. Villon, Aurora S. Soriano at Antonio Evangelista at Roxas na papanagutin si Delos Angeles at iba pang opisyal sa pagbagsak ng Legacy group. Bukod kay Delos Angeles, kinasuhan din sina Maria Concepcion P. Delos Angeles, Niccolo Martin P. Delos Angeles, Purita G. Delos Angeles, Victorino G. Delos Angeles, Christine A.C. Limpin, Madeline C. Cobarrubias, Norman H. Tiongson, Ladho Chugani, Ricardo Solomon, Arcatomy S. Guarin, Elvira P. Garcia, Cecile Invencion, Bishop Ignacio Soliba, Monina Viernez-Dio, Edgardo M. Marasigan, Elvira Nebre, Teresita Tica, Josefina Castaneda, Agnes Santiago at iba pang ‘di kinilalang opisyal at tauhan ng kumpanya. Ayon sa reklamo, kasama si Delos Angeles, mga kaanak at opisyal na kumokontrol sa Legacy Consolidated Plans Inc., Scholarship Plan Philippines Inc., at All Asia Plans Corporation. “The above-named respondents are the responsible officers and directors of various pre-need corporations belonging to the Legacy Group of Companies, who all conspired and confederated with one another in committing the crime of syndicated estafa, as defined and penalized under Presidential Decree No. 1689 in relation to Article 315 of the Revised Penal Code," nakasaad sa reklamo. Sinabi ng mga complainant na umabot sa halagang P705,101.40 ang perang inilagak nila sa mga pre-need companies ni Delos Angeles. “The money we paid for our respective pre-need plans as above detailed was supposed to have been held in trust for the payment of our respective needs, e.g., tuition, pension, etc., upon maturity as stipulated in the contracts. However, payment became impossible as these amounts were deliberately diverted, misappropriated, or misused by the respondents," inihayag ng mga nagrereklamo. Idinagdag ng mga planholders na lubha silang naingganyo sa malaking pangakong kita sa ipapasok na puhunan sa kompanya ni Delos Angeles. “The intricate and elaborate organizational structure of the companies coupled with the existence of interlocking officers and interrelated services show that the Legacy Group of Companies is a vehicle intended to illegally amass funds from the public without drawing suspicion that these funds are actually intended to be converted to personal and other uses of herein respondent Celso Delos Angeles and his cohorts," anila. Batay sa mga dokumentong nakapaloob sa reklamo, sinabi ng mga planholders na milyong-milyong halaga ng trust funds na siyang dapat gagamitin na pambabayad sa kanila ang napunta sa personal account ni Delos Angeles. Ipinambabayad din umano ni Delos Angeles at iba pang respondents ang salapi ng mga planholders sa personal na aktibidad nito tulad ng talent fees ng artista sa selebrasyon ng kaarawan ni Martin Niccolo, campaign funds nito nang tumakbong mayor sa Albay, sahod ng katulong, pagkukumpuni ng sariling yate, medical bills, electricity bill, advertisement, at domestic travel expenses. “These fraudulent acts cannot but lead to the eventual dissipation of the funds remitted by the herein complainants pursuant to their pre-need policies," reklamo ng mga planholders. “Pasimula pa lang ito. Marami pang mga kaso ang ihahain sa iyo. Hindi ka namin titigilan. Niloko mo, tinarantado mo ang mga biktimang ito, mga inosente, walang kalaban-laban. Pero, ngayon lalaban sila at hindi namin 'to titigilan," ayon kay Roxas. - GMANews.TV