Postponement sa klase sa Cebu City lang - CHED 7

CEBU CITY, Philippines - Mga kolehiyo ug unibersidad lang sa Sugbo ang gitugutan nga maka-uswag sa pagbukas sa klase sa Hunyo 15 inay nga sa petsa 8. Gipatin-aw sa Commission on Higher Education nga ang mga kolehiyo lang og mga unibersidad ang nalakip sa kamanduan sa CHED. Samtang ang Department of Education na ang makahukom kon i-uswag ba, o ipadayon ang pagbukas sa klase sa elementary ug high school sa private schools. Gipatin-aw ni Dr. Candelario Aytona, OIC regional director sa CHED Region 7 nga iya ra hinoon sa mga pribadong tunghaan kon isibog ba, o ipadayon ang klase. Hinoon mahimong ipadayon ang klase sa high school ug elementary nga gitanyag sa mga kolehiyo ug mga unibersidad karong adlawa. Bisan kon atua ra sa De La Salle ang kaso sa A(H1N1) virus, giawhag gihapon sa CHED 7 ang mga tinun-an nga magmatngon ug manlimpyo kanunay. Iyang giawhag ang mga magtutudlo nga bantayan ang kahimtang sa mga tinun-an ilabina na ang mga langyaw. Gisibog sa CHED sa kauluhan ang klase sa mga unibersidad human adunay pipila sa A(H1N1) nga naglambigit sa mga tinun-an. - Balitang Bisdak