RP gumagawa ng paraan para maligtas sa bitayan ang Pinay sa Kuwait

MANILA – Dalawa pa ang natitirang hakbang na maaaring gawin ng gobyerno upang mailigtas sa kamatayan ang overseas Filipino worker (OFW) na hinatulan ng kamatayan sa Kuwait. Sa isang pahayag nitong Martes, tiniyak ni Vice President Noli de Castro na iaapela ng pamahalaan sa Korte Suprema ng Kuwait ang hatol kay Jakatia Pawa. Kamakailan ay pinagtibay ng Court of Appeals ang hatol na kamatayan kay Pawa dahil sa umano’y pagpatay nito sa 22-anyos na anak ng kanyang amo. Itinanggi naman ni Pawa, 33-anyos, tubong Zamboanga Del Norte, ang alegasyon at sinabing na-frame up lamang siya. “We received report from Ambassador Ricardo Endaya, the Kuwait Court of Appeals sustained the death verdict on Pawa. Our next move now is to appeal the case to the Kuwaiti Supreme Court," ayon kay De Castro. Bukod sa pag-apela sa SC ng Kuwait, sinabi ni De Castro na maaari ring humingi ng patawad si Pawa sa pamilya ng biktima. “This measure of asking for Letters of Forgiveness (Tanazul) from the victim’s family is also being done now," pahayag ni De Castro na siya ring presidential adviser on overseas Filipino workers (OFW). Mariing pinabulaanan din ng bise presidente ang alegasyon na pinabayaan nila ang kaso ni Pawa kaya natalo ito sa kaso. “Our government hired two top-caliber Kuwaiti criminal lawyers to defend her. They are attorneys Khaleel Al Qattan and Mohammed Al Saba. The government was all out in giving her legal representation so her rights will be fully protected," paliwanag ng opisyal. Umaasa umano siya na magkakaroon din ng positibong resulta sa pag-asikaso nila sa problemang kinakaharap ni Pawa tulad ng nangyari sa kaso nina Marilou Ranario at May Vecina. “The government is really exhausting all means to save Pawa from death row and we are optimistic that our efforts will be fruitful, just like in the cases of Marilou Ranario and May Vecina whose death sentences were commuted," ayon kay De Castro. - GMANews.TV