Lakas ‘orig’ may sariling pambato sa 2010 polls

MANILA – Makikita ang biyak sa partido ng administrasyon na Lakas-Kampi-CMD kapag itinuloy ng mga Lakas-CMD “originals" ang plano na pumili ng sarili nilang kandidato na susuportahan sa panguluhang halalan sa Mayo 2010. Sa isang pahayag nitong Martes, sinabi ni dating Speaker Jose de Venecia na pamumunuan niya ang isang komite na kinabibilangan ng mga unang miyembro ng Lakas-CMD, upang rebisahin ang sitwasyong pulitikal sa bansa. “The committee would review the political situation and recommend the best political parties to ally with and nominate a candidate for President who must lead the battle against corruption and poverty," ayon sa dating lider ng Kamara de Representantes. Kasama umano sa komite sina dating senador Leticia Ramos Shahani at Santanina Rasul, dating Interior Secretary Cesar Sarino, dating Transportation and Communications Secretary Luis Lagdameo, dating congressmen Toti Carino at Jose Tan Ramirez, Marietta Primicias-Goco. At Ed Malay, tagapagsalita ni dating Pangulong Fidel Ramos. Ang komite ay nabuo matapos ang pulong na dinaluhan ng 50 pulitiko kasama sina Ramos at De Venecia na ginawa sa bahay ng dating speaker sa Makati City nitong Martes. Sa kabila nito, duda naman si House Speaker Prospero Nograles, vice chair ng Lakas-Kampi-CMD, kung magkakaroon ng “impact" ang gagawing pag-indorso ng mga Lakas "originals." "Not too much impact especially if they are tired or retired or out of the political scene for some time," pahayag ni Nograles sa text message sa GMANews.TV. Kabilang sa pinagpipilian na pambato ng Lakas-Kampi-CMD sina Vice President Noli de Castro, Defense Secretary Gilberto Teodoro Jr., Metropolitan Manila Development Authority chairman Bayani Fernando. Una rito, nagpahayag ng pagtutol sina Ramos at De Venecia sa pagsasanib ng Lakas-CMD at Kampi dahil hindi umano sinunod sa ginawang proseso ang constitution and by laws ng Lakas-CMD. Ayaw kay Noli Iginiit naman ni Lanao del Sur Rep. Abdullah Dimaporo, lider ng Lakas-Kampi-CMD sa Mindanao, na hindi dapat kuning standard bearer ng administrasyon si De Castro. Bagaman marami umanong tagahanga si De Castro, kinukuwestiyon naman ni Dimaporo ang kakayahan ng dating brodkaster na mamuno sa bansa. “No, (he should) not (run) under administration party. Many will bolt out of the party on issue of lack of leadership. He has fans, but no leaders who would mobilize his fans," babala ng kongresista. Binigyan ni Presidential Political Adviser Gabriel Claudio, secretary-general ng Lakas-Kampi-CMD, si De Castro ng hanggang Setyembre 15 (isang linggo) para magdesisyon kung interesado na makuha ang suporta ng administrasyon sa panguluhang halalan. Kumpiyansa naman si Valenzuela Rep. Magtanggol Gunigundo, kasapi ng Lakas-Kampi-CMD, na si De Castro ang pinakamalakas na maipangtatapat ng administrasyon sa mga pambato ng oposisyon. “As the field of presidential aspirants narrow to just three or four contenders, VP Noli’s chances to get to the top will become more evident. With opposition hopelessly divided, administration bet can make it on top of the heap," ayon sa kongresista. Sinabi ni Manila Rep. Bienvenido Abante, kasapi ng administrasyon, na kasalanan ni De Castro kung bakit maraming kapartido ang nagdududa sa kakayahan ng dating brodkaster. “At this time because of his dilly-dallying, a lot of party members are getting disappointed with him. He has to make up his mind if he wants to lead the party to victory and it must be soon," ayon kay Abante. - GMANews.TV