Kasunod ng aktor na si Dan Fernandez: Malabon-Navotas solon sinibak ng HRET

MANILA – Isa pang kongresista ang ipinasisibak ng House of Representatives Electoral Tribunal (HRET) sa listahan ng mga mambabatas sa Kamara de Representantes matapos lumitaw na natalo sa isinagawang recount ng mga boto noong 2007 elections. Sa pinagtibay na 65-pahinang desisyon ng HRET noong Setyembre 24, na pinirmahan ni Supreme Court (SC) Justice Consuelo Ynares-Santiago, HRET chairman, idineklarang natalo sa recount si Malabon-Navotas Rep. Alvin Sandoval, laban kay Josephine Veronica “Jaye" Lacson na nakalamang ng 542 boto. Lumabas sa recount na nakakuha si Lacson ng kabuuang boto na 70,655, kontra sa 70,113 boto ni Sandoval. “Wherefore, premises considered the tribunal hereby declares that protestant Josephine Veronique Lacson is the duly elected representative of the lone legislative district of Malabon City-Navotas in the election held on 14 may 2007, with a winning margin of 542 votes, with the right to assume the duties of her office consequently, protestee Alvin Sandoval is hereby declared unseated," nakasaad sa desisyon ng HRET. Ayon kay Baguio City Rep. Mauricio Domogan, kasapi ng HRET, binigyan si Sandoval ng hanggang Lunes para maghain ng motion for reconsideration. “But in filing the motion for reconsideration, he should present new arguments to reverse the ruling," paliwanag ni Domogan. Sa inihaing petisyon ni Lacson na naging basehan ng recount, sinabi nito na nagkaroon ng malawakang dayaan sa bilangan ng boto sa 623 ng kabuuang 1,436 precincts sa Malabon City-Navotas. Nang iproklamang panalo si Sandoval, nakakuha ito ng 71,490 kontra sa 70,331 boto ni Lacson o kalamangan na 1,159 boto. Si Sandoval, kilalang kaalyado ng administrasyong Arroyo, ay tumakbong kongresista sa ilalim ng partidong Lakas-CMD. Kapatid siya ng dating kongresista sa distrito na si Ricky Sandoval, kabilang sa grupong “Spice Boys" sa Kamara na nanguna sa pagpapa-impeach kay dating Pangulong Joseph Estrada. Bukod kina Ynares-Santiago at Domogan, ang iba pang kasapi ng HRET na pumirma sa desisyon sa kaso ni Lacson ay sina Justices Conchita Carpio Morales at Ma. Alicia Austria-Martinez, Baguio City Rep. Capiz Rep. Fredenil H. Castro, Bohol Rep. Roberto C. Cajes, Ifugao Rep. Solomon R. Chungalao, Laguna Rep. Justine Marc Chipeco at Aklan Rep. Florencio T. Miraflores. Naunang pinatalsik ng HRET bilang kasapi ng Kamara si Laguna Rep. Dan Fernandez. Inaasahang tatanggalin na sa listahan ng mga kongresista si Ferandez sa Lunes kung hindi pa rin ito makakakuha ng temporary restraining order sa Korte Suprema. - GMANews.TV