Winston Garcia moparehistro sa Cebu City

Government Service Insurance System general manager Winston Garcia giingong mobalhin og parehistro gikan Mandaue dinhi na sa dakbayan sa Sugbo. Gihugohugonan nga maoy modagan pagka-mayor sa ticket sa oposisyon sa Cebu City. Gikompirmar ni Atty. Marchel Sarno nga nanawag ang kampo ni Winston Garcia nga magparehistro na sa Biernes. Si Winston giingong rehistrado sa dakbayan sa Mandaue sud na sa taas nga panahon. Wa hinoon makahibawo ang Commission on Elections kun duna bay intensyon si Winston nga magpapili sa syudad sa Sugbo sa umaabot nga piniliay. Pero daghan ang nagduda nga posible nga modagan si Garcia pagka-mayor. Hinoon ang kampo ni Mayor Osmeña wa mabalaka kun ihinayon ni Winston ang pagdagan. Kun mahinayon, upat na ang modagan pagka-mayor sa Cebu City. Si Georgia Osmeña, kanhi Senador Sonny Osmeña, Winston garcia ug Mike Rama. Wa isalikway ni Rama nga usa ka lig-on nga kandidato si Winston. Apan iyang gihangop nga dunay Garcia nga moatbang kaniya. - Balitang Bisdak