Pagpapel ng Palasyo sa kaso ni ex-Gen Garcia, ipinababasura ng Ombudsman sa Sandiganbayan

MANILA – Hiniling ng prosekusyon ng Office of the Ombudsman sa Sandiganbayan na ibasura ang mosyon na inihain ng Office of the Solicitor General (OSG) para makialam ang pamahalaan sa kasong plunder at money laundering laban sa dating military general na si Carlos Garcia. Sa ipinadalang komento ng Ombudsman-Office of the Special Prosecutor (OSP) na pinamumunuan ni Special Prosecutor Wendell Barreras-Sulit, iginiit nila na dapat ibasura ng Second Division ng Sandiganbayan ang mosyon ng OSG dahil sa kawalan ng merito. Nais ng OSG na harangin ang kontrobersiyal na plea bargain agreement na pinasok ng Ombudsman kay Garcia noong 2010 na naging daan para pansamantalang makalaya ang dating heneral sa bisa ng piyansa. Nakapaloob din sa 53-pahinang komento ng OSP, ang kahilingan sa anti-graft court na ibasura ang mosyon ng OSG na suspindihin at pagdinig sa naturang pinasok na kasunduan habang hindi pa nadedesisyunan ang omnibus motion to intervene ng Palasyo. Pinayagan ng korte si Garcia na makapagpiyansa at pansamantalang pinalaya matapos umamin sa mas mababang kaso ng direct bribery na bahagi umano ng kasunduan. Sa mosyon ng OSP na pirmado rin nina Deputy Special Prosecutors Robert Kallos at Jesus Micael, at Asst. Special Prosecutors II Jose Balmeo Jr. at Joseph Capistrano, iginiit nila na walang “legal personality" ang OSG para panghimasukan ang kaso ni Garcia.
For the latest Philippine news stories and videos, visit GMANews.TV Tinutulan ng Palasyo ang naturang kasunduan dahil agrabyado umano ang gobyerno at malakas ang katibayan laban kay Garcia. Ngunit kabaligtaran naman ang pananaw ng Ombudsman at iginiit na hindi sapat ang katibayan para idiin si Garcia sa mga kasong isinampa ng gobyerno. Iginiit ng kampo ng Ombudsman na sila (Tanodbayan) lamang ang tanging may kapangyarihan sa ilalim ng batas mula pa noong 1979 para humarap sa mga kasong dinidinig sa Sandiganbayan. Ang paghawak ng Ombudsman sa mga kaso sa Sandiganbayan ay nakapaloob umano sa Republic Act 1630 noong July 1979, at sa RA 6770 na niratipikahan naman matapos mabuo ang 1987 Constitution. “The law invoked by the OSG in support of its position that it could intervene in this case is a general law," paliwanag ng mga abogado ng Ombudsman. Binalewala rin ng mga prosekutor ang katwiran ng OSG na ang Armed Forces of the Philippines ang nadehadong partido sa kaso ni Garcia. “The information obviously provides that the offended party in this case who has been injured by the acts of Gen. Garcia who, in conspiracy with unknown persons, amassed, accumulated and acquired ill-gotten wealth, and in taking advantage of his position, is the Filipino people and the Republic of the Philippines," paliwanag ng kampo ng Ombdusman. “Granting for the sake of argument that the AFP funds are involved in this case, it must be noted however that the AFP is but a component of the People of the Philippines, who is already properly represented before the Honorable Court by the Tanodbaya, through the Office of the Special Prosecutor," dagdag pa nila. - GMANews.TV