Penitential Walk for Life Gidagsa sa Liboang Sugboanon

Liboan nga mga Sugboanong Katoliko ang misalmot sa walk for life nga gipahigayon sa Simbahang Katoliko sa Sugbo batok sa pagpalabang sa Reproductive Health Bill. Ang penitential walk gipahigayon sa Sabado sa gabii taliwa'a sa kusog nga pagbunok sa uwan og kabugnaw sa panahon. Sa unang tuig sa pagkasaulog ni Arsobispo Jose Palma sa iyang ika-61 ka tuig nga adlaw'ng natawhan niadtong Marso 19 isip Arsobispo sa Sugbo, pagbatok sa RH Bill maoy nag-una niyang gi-atubang. Si Palma mao usab ang Bise Presidente sa Catholic Bishops Conference of the Philippines (CBCP). Wala gani igsapayan sa pipila ka mga tawo nga misalmot sa penitential walk for life bisan pa sa pagbunok sa uwan. Usa si Lourdes Natad, parokyano sa Our Lady of Holy Rosary Parish sa dakbayan sa Naga misalmot sa walk for life bisan sa kalayo sa ilang dapit. Matod ni Natad nga gusto niyang duyogan ang pagsupak sa simbahang Katoliko batok sa Reproductive Health Bill tungod kay maghatag kini og kadautan sa matag banay. Samtang si Jeguer Noya, Augustinian Vocations Promoter mipadayag usab sa iyang pagsupak sa nag-ong-ong nga balaodnon. Ang iyang pagsalmot sa walk for life maoy pagpadayag niya sa pagsupak sa balaod. Si Arsobispo Jose Palma mitapos sa walk for life sa usa ka Santos nga Misa sa Cebu Metropolitan Cathedral. (APA)