Abo ni Atty. Jesus V. Ayala gidala sa Tagum City

Abo sa namatayng negosyante ug philanthrophist sa dakbayan sa Davao nga si Atty. Jesus V. Ayala, gidala na sa Tagum City, Davao del Norte. Si Ayala daku ug natampo sa maong syudad hilabi na nga gi-donar niini ang dul-an 12 ektaryas nga yuta na maoy gitukuran karon sa bag-ong City Hall sa Brgy. Apokon, Tagum City. Hwebes sa hapon gituyok ang abo ni Ayala palibot sa bag-ong City Hall dayon sa gidumalang Hijo Resources Corporation una pa ihatod sa Christ the King Cathedral alang sa Santos nga Misa ug necrological service. Abril 30 gikatakdang ilupad ngadto sa kauluhan ang abo ni Ayala aron ihaya sa Ateneo de Manila High School Chapel ayha pa kini ibalik sa Davao City aron ipahiluna sa iyang propredad sa Brgy. Eden, Toril. Mas ilado sa angga nga si Chito, si Ayala mipanaw niadtong Abril 19, alas 6:45 sa gabii, sa edad nga 82 anyos. Dugay na kuno siyang gi-dialysis human naapektuhan ang kidney niini nga miresulta na sa multiple organ failure. Human kini gi-cremate, gihaya ang abo niini sulod sa usa ka semana sa Bulwagan sa pamilyang Ayala sa Juna Subd., Matina, Davao City. Gani, Huwebes Santo sa udto, miabot si Pangulo Noynoy Aquino sa dakbayan aron mutambong sa gihimong panagtapok sa pamilya ug kahigalaan ni Ayala. Iladong suod nga higala sa pamilyang Aquino ang namatayng negosyante. Hinuon, wala nagdugay si P-noy sa maong panimalay sa mga Ayala ug una pa mag-alas 3 sa hapon sa samang adlaw, mihawa na kini pauli sa kauluhan. Samtang si Vice Mayor Rodrigo Duterte kinsa usa usab sa mga suod nga higala ni Ayala,mipadayag sa iyang labing taas nga pagtahod ingon man utang kabubut-on ngadto sa namatayng industrialist. Domingo sa gabii, Abril 24, nagtapok usab ang grupong Samahan ng mga Musikero sa Davao Inc. (SAMADHI) aron magpahigayon ug tribute alang kang Ayala. Nagkadaiyang musikero ang nag-perform sama ni Popong Landero ug uban pa. Si Ayala mahiligon usab sa musika ug misuporta gayud kanilang mga musikerong Dabawenyo diin napakita ang ilang talento sa musika pinaagi sa paghatag ug higayon nga magpasundayag diha sa Taboan sa Matina Town Square nga iya sa pamilyang Ayala.