Mga residente sa Sitio Langan, Sta Cruz, Davao del Sur, wala pay kabalhinan

Sta Cruz, Davao del Sur -- Kalmado na si Manang Tessie Sarocam, ang inahan sa duha ka bata nga nadat-ugan og bato niadtong milabayng semana sa Sitio Langan, Brgy. Sta. Cruz, Davao del Sur dihang gikahinabi sa GMA News. Apan wala gihapon niini napugngan nga mkahilak kung mahinumduman ang iyang duha ka anak. “Lisod man dawaton. Pinangga ko gud tong akong mga anak. Gimingaw gyud ko...maglisod ko sa pagdawat", saysay ni Tessie sa iyang gibati human sa pipila ka adlaw na nga pagpanaw sa iyang mga anak. Samtang kamatikdan nga ang 20 ka mga residente sa maong lugar, wala gihapon mihawa bisan pa man sa hitabo ug luyo sa mando ni Mayor Joel Ray Lopez. Rason sa mga nagpabiling residente, hangtod karon, wala pa kuno silay mabalhinan ug ang saad sa gobyerno nga relokasyon, wala pa usab. “Kulbaan na jud mi ba. Basi balikan na sab mi sa bato, lisod na pero maghulat lang mi sa saad ni Mayor. Ulaw man pod kung mamugos mi nga nakasaad na baya siya, maghulat ra mi" , sigun sa usa sa mga residente sa maong lugar. Hinuon, adlaw lamang sila sa magpundo sa maong lugar tungod kung gabii, sa barangay hall sila magpundo. Sa kabahin sa Barangay, naglisod kuno sila sa pagpangita og yuta. Pipila na kuno ka luna ang ilang gihangyo apan dili kuno ibaligya apan dili kuno sila moundang sa pagpangita. “Paspasan namo sa pagpangita kay mao ang mando ni Mayor. Pero gina-provide namo ang ilang mga needs sama sa ilang pagkaon, mga habol ug gani unlan pa", pahayag ni Brgy. Kapitan Proceso Gido Jr.