Gi-recall nga noodle products, gipangpull out na matud sa FDA-XI

Gibutyag sa supervisor sa Food and Drug Administration kon FDA-XI, Debbie Legaspi nga base sa monitoring sa ilang regulation officers, gipull-out na ang mga Maggi noodle products nga beef ug chicken flavor sa mga grocery stores sa mga dagkung malls ingon man sari-sari stores sa Rehiyon XI. Ang maong lakang subay sa gipagulang recall order sa Nestle Philippines human sumala pa nakontamina ug kagaw nga salmonella ang maong produkto. “Sa mga napuntahan naming mga supermarkets, wala na kaming nakitang mga Maggi products, pinull-out na ng Nestle Philippines," sumala ni Legaspi. Busa gisuta sa GMA NEWS ang supermarket sa Gaisano South Mall sa Davao City, ug nasayran nga dili lang ang maggi noodles nga dunay lot codes nga 11020598A2 ug 11030598A1 ang ilang gipull-out apan tanang mga produkto sa Maggi noodles. “Pinull-out namin agad as adviced by Nestle Philippines and FDA para safe ang mga customers namin dito," matud ni Marilyn Purgatorio, ang Department Head sa Gaisano South Mall Supermarket. Gidugang sa Department Head sa nahisgutang supermarket, niadtong May 5, kuno nila gipull-out ang maong mga produkto human sila nakadawat ug recall order sa Nestle ingon man FDA ug niadtong Mayo 6, giuli sa maong mall ang mga Maggi products sa Nestle Philippines. Samtang giangkon sa FDA nga dili kuno sayon ang pagmonitor sa maong produkto ilabina sa mga sari-sari store. Busa panawagan sa maong buhatan sa katawhan, nga angay gayud magmabinantayon ug ireport dayon sa ilang buhatan kung duna pay namaligya sa maong produkto aron daling maaksyunan.