Taga-Janiuay, nag-Bayanihan para sa ‘Brigada Eskwela’

Naglinupok ang mga balloon sa Abangay National High School sa banwa sang Janiuay kag naghinugyaw ang mga pumuluyo. Ini ang nagsugod sang Brigada Eskwela activities Lunes sang aga sa eskwelahan nga nagaserbisyo sa walo tanan ka mga barangay. Tumalagsahon naman ining Brigada Eskwela diri sini nga tuig tungod magluwas sa mga manunudlo, ginikanan kag mga bumulutho, nagbulig man paninlo, pangkaayo kag paminta ang mga katapo sang mga ahensiya kag organisasyon pareho sang ila alumni association. Dako gid ang kalipay sang mga taga-Abangay National High School sa pag-ulikid nga ila nabaton gikan sa mga nagpasakop sa Bayanihan. Gani ang Principal nga si Ma. Teresa Campaniel todo ang yuhum nga ginbalos sa mga nagbululig. Suno sa iya, ka damo sang dapat obrahon gani ang mas madamo nga maga-obra sang sining mga buluhaton ang magapadali sang tanan. Nag-upod sa Brigada Eskwela sa Abangay ang mga opisyal sang kaiping nga barangay, rural health workers, Janiuay Police Station, 322nd PNP Mobile Command Group, kag Triskelion Grand Fraternity and Sorority-Janiuay Chapter. Isa ang Abangay National High School sa lima ka mga buluthuan nga nakabaton sang pasidungog halin sa Department of Education bilang “Best School-based Management Implementer," isa sa tatlo ka mga Outstanding School sa Category B sa Division Level kag Rank 1 sa Category B sa 3rd Congressional District sang School Year 2009-2010. RJS/GMA News Iloilo.