‘KKK’ ni PNoy, pinaiimbestigahan sa Kamara

MANILA – Naghain ng resolusyon sa Kamara de Representantes nitong Huwebes ang grupo ni dating Pangulong Gloria Macapagal-Arroyo para paimbestigahan ang ilang “Kaibigan, Kaklase at Kabarilan (KKK)" na itinalaga sa puwesto ni Pangulong Benigno Aquino III na nasangkot sa mga kontrobersiya. Sa House Resolution 1419, hiniling ng oposisyon sa pangunguna ni House Minority Leader Edcel Lagman, na imbestigahan ng House Committee on Good Government and Public Accountability, sina Interior and Local Government Undersecretary Ricardo Puno, Land Transportation Office chief Virginia Torres, Finance Sec. Cesar Purisima at dating Bureau of Corrections (Bucor) director Ernesto Diokno. Iginiit ni Lagman na kailangang imbestigahan ang mga naturang opisyal dahil nabigo si Aquino na papanagutin ang mga opisyal sa mga kontrobersiya na kanilang kinasangkutan. (Basahin: Oposisyon, hinamong kasuhan ang mga opisyal ni PNoy na sangkot sa katiwalian) “In a democratic Republican State, the rule of law is sacrosanct and no man is above the law. Public officials and employees must maintain at all times integrity, competence and industry in order to remain in public office," nakasaad sa resolusyon. Idinagdag pa na, “There are not a few public officials in the Aquino Administration who fall under the dubious classification of Kaibigan, Kaklase at Kabarilan (KKK) who have run afoul of the law and/or have committed palpable and culpable malfeasance, misfeasance and nonfeasance." Bukod kina Lagman at Arroyo, kasama rin sa nakapirma sa resolusyon sina Reps. Danilo Suarez (Quezon), Martin Ferdinand Romualdez (Leyte), Mitos Magsaysay (Zambales), Carlos Padilla (Nueva Vizcaya), Marc Douglas Cagas (Davao del Sur), Augusto Syjuco (Iloilo), Simeon Datumanong (Maguindanao), Diosdado Arroyo (Camarines Sur), Iggy Arroyo (Negros Occidental), Leopoldo Bataoil (Pangasinan) at Amelita Villarosa (Occidental Mindoro). Nakasaad sa resolusyon na hindi umano kumilos sa Aquino na papanagutin ang ilan sa mga nabanggit na opisyal kahit pa hindi naging paborable sa mga ito ang resulta ng imbestigasyon sa kinasangkutan nilang usapin. Ang usapin kay Purisima ay tungkol sa umano'y hindi nito isinumiteng income tax return noong 2007-2008. Habang may kaugnayan sa resulta ng imbestigasyon ng Incident Investigation and Review Committee (IIRC) sa madugong hostage taking sa Grandstand, Luneta ang puntirya kay Puno. Samantala, nais ng oposisyon na imbestigahan si Torres tungkol sa kontrobersiyal na kontrata sa information technology (IT) provider na Stradcom Corporation ng Department of Transportation and Communication (DOTC). Kahit nagbitiw na, nais pa rin ng grupo nina Lagman at Arroyo na imbestigahan si Diokno tungkol sa iskandalo sa Bureau of Corrections (Bucor) – na ayon kay Aquino ay itatalaga niya sa ibang posisyon. Nagbitiw sa puwesto si Diokno matapos mabunyag ang paglabas sa New Bilibid Prison ng bilanggong si dating Batangas gov Antonio Leviste, kahit walang kaukulang permiso. -- GMA News