Apple co-founder at dating CEO Steve Jobs, pumanaw na

Matapos ang ilang taong pakikipaglaban sa cancer at iba pang karamdaman, pumanaw na ang co-founder at dating CEO ng Apple Inc. na si Steve Jobs nitong Miyerkules (Huwebes sa Manila) sa edad na 56. Ang pagpanaw ni Jobs ay ipinaalam ng Apple Inc. Matapos ang pagbibitiw ng Silicon Valley icon na ito na nagpakilala sa mundo ng iPod at iPhone, ipinasa niya ang tungkulin bilang CEO nitong Agosto sa isa sa mga pinakamalaking korporasyon sa buong mundo kay Tim Cook, ang chief executive ng kumpanya. Lubos na napatunayan ni Jobs ang kanyang kagalingan sa kanyang mga nagawa para sa kumpanya, sa kabila ng patuloy niyang paglaban sa sakit na pambihirang klase ng pancreatic cancer. "Steve's brilliance, passion and energy were the source of countless innovations that enrich and improve all of our lives. The world is immeasurably better because of Steve," ayon sa pahayag ng Apple sa pagpanaw ni Job. "His greatest love was for his wife, Laurene, and his family. Our hearts go out to them and to all who were touched by his extraordinary gifts." Tampok ngayon sa website ng Apple ang isang black-and-white na imahe ni Jobs na may nakasulat na "Steve Jobs 1955-2011." "Apple has lost a visionary and creative genius, and the world has lost an amazing human being. Those of us who have been fortunate enough to know and work with Steve have lost a dear friend and an inspiring mentor. Steve leaves behind a company that only he could have built, and his spirit will forever be the foundation of Apple," ayon sa mensaheng nakapaskil sa website. Nakalagay rin sa website na maaaring magpadala ng kanilang mga saloobin at pakikiramay sa pamamagitan ng pag-email sa rememberingsteve@apple.com. Binanggit din sa tech site na Mashable ang pagpanaw ni Jobs. Naglabas naman ng mga salaysay ang ilang tech sites na nagtatampok sa kagalingan ni Jobs sa kanyang trabaho. "One of the most legendary businessmen in American history, Jobs turned three separate industries on their head in the 35 years he was involved in the technology industry," pahayag ng CNET. Ipinahayag din ng CNET na ang ilan sa mga likha ni Jobs ay nagpabago at nagpa-angat sa teknolohiya ng mundo, tulad na lamang ang mga produkto na Apple II (1977), iPod at iTunes (early 2000s), iPhone (2007), at ang iPad (2010). Aniya, "Jobs was considered brilliant yet brash. He valued elegance in design yet was almost never seen in public wearing anything but a black mock turtleneck, blue jeans, and a few days worth of stubble. A master salesman who considered himself an artist at heart, Jobs inspired both reverence and fear in those who worked for him and against him, and was adored by an army of loyal Apple customers who almost saw him as superhuman." — Amanda Fernandez/RSJ, GMA News