Multicab nga gi-carnap nakit-an sa compound sa kampo sa pulis

Unsay gibuhat sa kinawat nga sakyanan sulod sa kampo sa police?   Tuyong miadto si Felix Inopia nga taga-dakbayan sa Talisay sa Highway Patrol Group (HPG) aron magpatabang para ma-recover ang nahanaw niyang multicab niadtong Nobyembre 22.   Apan dako iyang kakugang dihang nakita niya ang sakyanan sulod sa compound sa Camp Sotero Cabahug sa may Gorordo Ave. ning dakbayan.   Sa gihimong joint operation sa HPG ug sa Criminal Investigation and Detection Group, nasikop ang upat ka suspect nga sila si Danilo Bataluna, Nexon Jumao-as, Christian dela Cruz ug Rey Gonzaga. Naka-ikyas ang giila nga mastermind sa grupo.   Matud ni Chief Inspector Eduardo Mara, sa HPG-7, sindikato ang nagpaluyo sa kidnapping.   “Ma-describe nato as sindikato kay kini si Mr. Lambojon (giilang mastermind) nga ilang gitudlo nga pinaka-mastermind is mao may mokuha, mokawat and then kini si Bataluna mao ni ang mo-deliver” asoy ni Mara.   Sa inisyal nga imbestigasyon sa kapulisan, nilutaw ang pangalan ni PO3 Arvin Hernandez, sakop sa Regional Intelligence Division sa Police Regional Office 7 nga maoy nangahente aron mabaligya ang multicab.   Nasayran nga gi-deal ni Hernandez ngadto sa hepe sa PNP Crime Lab ang maong multicab sa presyo nga 20 mil pesos lang.   “Mo-file gyud ko sir aron motagam” matud sa biktima.   Nakugang usab ang mga opisyal sa PRO-7 sa pagka-apil sa ilang sakop sa nahisgutang krimen. Gipaabot pa nila nga makaluwat ug opisyal nga report una sila mohatag ug pahayag ngadto sa media. — Alan Domingo, GMA Cebu