Mga namaligya'g pabuto sa Davao Sur, gipulong

DAVAO DEL SUR — Mokabat sa 74 ka mga namaligya ug pabuto sa tibuok Davao del Sur ang mitambong sa seminar nga gipahigayon sa Davao del Sur Provincial Police, kini aron pasabton sila sa mga angayang buhaton aron makalikay sa disgrasya tungod sa pagbaligya ug pabuto.   December 27, 2009, naugdaw ang Bansalan Public Market sa maong probinsya human nasunog ang baligyaanan ug pabuto sa maong dapit, busa kini maoy gilikayan sa otoridad nga mausab pa.   Sa maong seminar, gipasabot ang mga firecrackers ug pyrotechnic vendors sa mga mamahimo lang ibaligya.   Subay sa Republic Act 7183 o ang regulasyon sa pagbaligya ug pabuto. Ubos sa maong balaud, ang mamahimo lang ibaligya nga pabuto ug ubang pyrotechnics mao ang mosunod:

• Baby rocket
• Bawang
• Small triangle
• Pull strings
• Paper caps
• El Diablo
• Watusi
• Judas belt
• Sky rocket
• Sparkles
• Fountain
• Jumbo regular ug special
• Mabuhay
• Roman candle
• Trompillo
• Airwolf
• Whistle device
• Butterfly

Gawas sa mga nakalista dinhi, bawal na ug ang mamaligya sa mga wala naapil sa listahan, mamahimong makamulta ug dili muubos sa P20,000 ug dili musobra sa P30,000 o pagkapriso nga dili muubos sa unom (6) ka bulan ug dili musobra sa usa (1) ka tuig dungan usab sa pagkansela sa lisensya ug business permit.   Ang tanang mamaligya, mag-distribute ug magmanufacture sa mga pabuto kinahanglan makakuha ug business permit ingon man permiso gikan sa Philippine National Police.     Ang mga manindahay, gisegurong mutuman gayud sa mga rekisitos, “tumanon para maiwasan ang sunog”, matud ni Pepe Gabriel, namaligya ug pabuto.   “Kana gyud ang gina-emphasize namo ug gi-example namo ang nahitabo sa Bansalan, naa gyud nakuha nga leksyon didto”, matud ni Police Sr. Supt. Ronaldo Llanera sa Davao del Sur Provincial Police.   Samtang gimanduan na sab ang mga kagamhanang lokal nga mohimo ug lakang aron makalikay sa disgrasya tungod sa pabuto. Busa ang Bansalan municipal government, gibalhin na ug lugar ang mga firecracker vendors ug dili na ibutang sa palengke.   “It was approved through resolution or ordinance adtong niaging tuig na ilayo gyud sila gikan sa palengke busa ibalhin sila sa Bonifacio Street diin mas open space ug mas layo sa disgrasya”, matud ni Bansalan Mayor Edwin Reyes. — Richy Nalagon, GMA Davao