Kontrata sa 121 ka casual employees sa Cebu City Hall wala gi-renew

Unsa ang nagpaabot sa 121 ka mga casual employees sa Cebu City Hall sa tuig 2012 nga wala na gi-renew? Mityabaw ang kasagaran sa mga empleyado sanglit sukad niadtong Enero 2, wala na sila patambunga sa ilang mga trabaho subay sa memorandum ni Mayor Michael Rama.   Gani, subay sa maong memorandum walay bisan usa sa mga miyembro sa Peace and Order Personnel (POP) sa Cebu City Hall ang makabalik pa sa ilang trabaho. Gikaguol kini sa mga empleyado ug matud pa nila, importante ang ilang trabaho gumikan kay kun may alarma, moagi kini sa ilang buhatan ug sila na ang mopahibaw niini sa pinakaduol nga mobile patrol group.   Kasagaran sa mga radio operators dul-an na sa duha ka dekada nga nagtrabaho ug gani, kahibaw na sila sa mga pasikot-sikot sa syudad.   Matud ni Philip Zafra, ang OIC sa POP Personnel nga gihatagan ug prayoridad karon ang pag-review sa evaluation report sa mga personnel.   “Kun siguro naay uban dinha nga dili ma-renew but majority of which ma-consider nato kay master naman gud nila ang trabaho. Like for example kung motawag ka ug alarma sa 166, maayu na sila mo-guide sa pulis” saysay ni Zafra.   Si Cebu City Disaster Risk Reduction and Management Council o CCDRRMC Executive Director Alvin Santillan sa iyang bahin, nagsugod na pagpanghipos sa iyang mga gamit. Gikahibong niya nga wala na siya giapil sa gi-renew nga empleyado.   “I called up the Mayor and asked him ‘Sir, my name was not included in the list and may I ask ngano sir?’ Ingon siya there was miscommunication on the part of the office, we’re trying to find out what went wrong” padayag usab ni Santillana.   Sa iyang bahin si Mayor Michael Rama mipasabot nga walay bahid sa politika ang wala pag-renew sa mga empleyado tungod kay gibasihan niini ang evaluation kanila. Gidasunan usab kini ni Jovy Morelos, HRD Head sa Cebu City Hall.   “Ang basis ana kadtong lima kabuok criteria sa mayor. There are five criteria nga gihatag sa mayor so kun wala ka ato nga criteria meaning (dili na ka i-renew)” pasabot ni Morelos. — Lou-anne Mae Rondina /GMA Cebu