Oplan I Love You gilusad sa LTFRB-Cebu

Sa Cebu, dili lang ang managhigugmaay ang magpakita sa ilang paghigugma sa umaabot nga adlaw sa mga kasingkasing apan lakip na usab ang mga taxi driver. Kini tungod sa paglusad sa Land Transportation Franchising Regulatory Board (LTFRB) sa Oplan I Love You sa umaabot nga Valentine's Day. Tumong niini ang pagsiguro nga walay mga abusadong driver nga mopahimos sa higayon sanglit daghan kaayo ang mga pasahero kung February 14. “Mohantok pag-ayo sa mga pasahero, mahimo silang mosumbong dayon diri sa LTFRB aron arong aksyunan. Mga taxi driver, nga hinaot pa unta ilang panggaon na ilang mga pasahero kay kanang ilang pasahero mao tawon nay naghatag nila og income” matud ni LTFRB Region-7 Director Ahmed Cuizon. Matud ni Cuizon, daghan silang nadawat nga taho kalabot sa overcharging sa mga taxi drivers ug ang uban magdumili paghatag og resibo. Sa pagpakighinabi sa GMA News sa usa ka taxi driver niangkon kini nga mag-overcharging. “Tan-aw nako nga murag layo sab pareha atong lovers lane, mo additional sad ta gamay ma'am oy, pun-i lang P20 ma'am, mosugot ra man pod,” saysay sa driver nga itago lang ang pangalan. Gihangyo usab sa LTFRB ang mga negosyante sa pagbutang ug signage sa LTFRB hotline sa mga motel, restaurant ug uban pang suruyanan. — Vic Serna /GMA Cebu