Mga taga-Barangay Vive sa Cebu, gipabakwit sa MGB

Nakita ang dakong pahak sa usa ka bungtod sa barangay Vive sa lungsod sa Ronda human motay-ug ang 6.9 magnitude nga linog niadtong miaging semana.   Nakita sa mga sakop sa Mines and Geosciences Bureau (MGB) ang mga tension cracks sa barangay. Gani usa sa ilang nakitang crack sa Sitio Langin adunay giladmon nga tulo ka kilometro.   Tungod sa ka-delikado sa lugar, mipahimangno ang MGB sa mga residente nga mamakwit.   “This time we see to it nga ang recommendation sa atong mga geologist, it’s an urgent concern that has to be activated immediately” pasabot ni Director Loreto Alburo sa MGB.   Adunay dul-an 150 ka mga pamilya ang nagpuyo sa tiilan sa bungtod. May eskwelahan usab nga nahimutang sa barangay nga adunay 300 ka mga estudyante.   Matud sa MGB nga dili kini ang unang higayon nga naghatag sila ug warning sa mga residente kalabot sa peligro sa lugar. Matod ni Director Alburo nga niadtong tuig 1996 ug 2009 pa sila mipahigayon ug geo-hazzard mapping sa lugar.   Ang PAG-ASA Visayas mipaabot usab sa susamang panawagan sanglit adunay nasigpatan nga low pressure area nga magdala ug mga pag-uwan sa kabisay-an. Pasabot sa PAG-ASA, mahimong moresulta sa landslide ang mga pag-uwan.   “Because of the La Niña, ang atong forecast ana, monthly forecast, ang February, we have above normal rainfall gyud na up to May. So gipaabot nato nga duna tay wet summer” pasabot ni Engr. Oscar Tabada, Director sa PAG-ASA Visayas.   Adunay mga residente sa Barangay Vive nga boluntaryong mibakwit apan ang uban nagpabilin ra gihapon. Ang local nga kagamhanan padayon sa pagkumbinser sa mga residente sa pagpamalhin tungod sa ka-delikado sa lugar.   “Dugay naman na akong gitun-an, also with the mines ang geodetic, oh, ila na nang gi-istudyuhan pero usahay kining kagahi’g ulo sa tawo ba nga mabiyaan nila ilang baol kuan mao nang di pod sila mobiya,” matud ni Mayor Mariano Blanco sa lungsod sa Ronda. —  Gregy Magdadaro, Vic Serna, Monching Auxtero /GMA Cebu