Opisyal ng DPWH na napagkatuwaan sa Facebook, marami umanong natutunan

Marami umanong natutunan ang isa sa tatlong opisyal ng Department of Public Works and Highways na napagkatuwaan noong 2011 sa Facebook gamit ang kanilang retrato na ipinatong sa kung saan-saang background photos gamit ang PhotoShop editing software. Ilang buwan na ang nakalipas mula nang kumalat sa mga social networking site ang isang public relations photo ng DPWH ng tatlong opisyal na nagsagawa ng inspeksyon sa Baywalk sa Roxas Boulevard matapos magiba ang seawall doon dahil sa malakas na pag-ulan at alon na dala ng Bagyong Pedring.

Nakakuha ng atensyon ang DPWH nang isiniwalat ng isang blogger ang umano'y pagiging peke ng retratong inilagay sa kanilang opisyal na Facebook account. Ayon sa blogger, artipisyal na pinagsama ang tatlong opisyal sa isang retrato gamit ang image editing software na Photoshop at hindi umano maayos ang pagkagawa kaya halata ang manipulasyon nito. Nakatanggap ng pambabatikos at naging katuwaan sa mga social networking site, lalo na sa Facebook, ang nasabing "manipulated" na retrato. May ilan ding memes ang kumalat base sa retratong nakalagay sa DPWH Facebook. Dahil dito, ayon kay DPWH National Capital Region OIC-Director Reynaldo Tagudando, isa sa tatlong opisyal na nakasama sa retrato, marami umano siyang natutunan sa insidente, kabilang na ang kahalagahan ng pag-iingat sa paggamit ng mga social networking sites. Kwento niya, hindi niya ikinatuwa ang pagiging tampok sa mga nasabing sites. "Kasi parang nilaro nila e," aniya. "Popularity in a negative way...." Ayon sa kanya, sa halip pagkatuwaan ang kanilang retrato, mas mabuti umanong gamitin ang mga social media site sa mga mabubuting paraan. Hinahamon niya ang publiko na gamitin ang Facebook account ng DPWH sa pagpahayag ng mga reklamo. "Gusto kong mangyari, gamitin 'yung tool na iyon para bantayan ang mga proyekto ng DPWH," aniya. Halimbawa, may proyekto kaming hindi tama ang ginagawa ng mga project engineer namin at contructor, let us know through our Facebook account." "Dati, ang complain pool namin, DPWH text line lang; noong pumasok si Secretary Rogelio  Singson, na-enhance na 'yan, may Facebook account, may website, mayroong call center 16502, everybody can call that number," dagdag pa niya. Ayon sa kanya, nais niyang makatulong ito sa pagiging transparent ng kanilang departamento. Aniya, mayroon na umanong apat na paraan upang iparating sa DPWH ang kanilang mga reklamo. Ito ay sa pamamagitan ng: Sa ngayon, nakikita na ni Tagudando ang mabuting aspekto ng social networking sites. Karamihan sa mga reklamong nakukuha nila ay mula sa Facebook. "Ang pinakamabili sa amin ay ang Facebook account, ang dami talagang complaints na ipinadadala diyan," aniya. Ayon sa kanya, nais umano ni DPWH Sec. Singson na gamitin ng mga mamamayan ang mga ito para mapabilis ang pagresponde ng departamento sa mga reklamo upang maiparamdam sa mga tao na "hindi natutulog ang DPWH." Upang mabigyang solusyon ang mga problema, mahalagang ipaalam muna sa kanila ang mga problemang may kinalaman ang ahensya. Dagdag niya: "Alam mo naman, may tao kami, pero hindi lahat ng sulok ng kalye ng Metro Manila nakikita namin. Sa iisang araw, hindi namin kayang tignan lahat." — LBG, GMA News