Donasyon gikan sa mga politiko dili na dawaton

Gibutyag ni Msgr. Achilles Dakay, tigpamaba sa archdiocese sa Sugbo, nga dili na modawat og donasyon ang Simbahan gikan sa mga politiko nga nakaduso na sa ilang certificate of candidacy sa umaabot nga eleksyon. Gikaingong nagsugod na’g “pangulitawo" ang pipila ka mga politiko sa simbahang Katoliko para suportahan sa piniliay. Nidumili si Dakay nga hinganlan ang mga naasoyng politiko, apan nipahimangno kini sa katawhan nga magbinantayon sa mga kandidatong pilion. Nidugang si Dakay nga kinahanglan gyud magpakabana ang tanan ilabi na ang mga pari pinaagi sa pagpakisayod sa mga isyu sa pulitika. Gipadayag usab ni Dakay ang mga hiyas sa mga kandidatong angayng pilion sa umaabot nga eleksyong lugaynon. Ang kandidatong angayng pillion kadtong maypagpakabana sa kahimtang sa mga kabus, dili hakog, ug labaw sa tanan way mantsa sa graft and corruption, matod pa ni Dakay. Sayo niini, nipagawas og pastoral statement ang Catholic Bishops Conference of the Philippines sa pagduso sa limpyo, matinod-anon, ug walay panikas nga piniliay. –Balitang Bisdak