Senatorial bets di imbitahon sa graduation rites

Gidid-an na sa Department of Education (DepEd) ang mga principal sa tanang tulunghaan pagdapit og senatorial candidates sa graduation ceremonies. Pinaagi niini, milaom ang DepEd nga makalikay sa mga pagsaway sa publiko kon tugotan ang mga kandidato nga mag-guest speaker sa graduation. Matud sa DepEd, usa usab kini ka paagi aron makalikay ang mga magtutudlo sa mga pagduda nga adunay paboran sa piniliay ilabina nga sila unya maoy moalagad isip board of election inspectors. Hinoon mga senatorial bets ra ang dili tugutan sa DepEd nga mamahimong dapitong guest speaker. Gitugotan niini ang tagdumala sa public schools nga modapit og piniling opisyal nga magpapili sa lokal nga katungdanan. Magsugod ang kampanya sa local elections sa petsa 30 sa Marso para sa local posts. Kadaghanan sa mga graduation ceremony gitakda sugod sa petsa 20 hangtod petsa 26 sa Marso sa mga pampublikong tunghaan. –Balitang Bisdak