Petisyon sang habeas corpus ginpasaka

Petition for writ of habeas corpus ginpasaka sang mga himata sang duha ka mga aktibista nga gin-abduct Abril 12, sa Oton, Iloilo. Pito ka adlaw matapos ginpang-abduct sanday Luisa Posa-Dominado kag Nilo Arado, nagpadulong sa talatapan ni Atty. Janne Baterna si Luis Arches Posa, utod ni Luisa, kag Rosemari Arado, asawa ni Nilo. Katuyuan sang mga ini nga mahimu-an paagi nga makita ang duha. Bug-os ang ila pagpati nga militar ang nag-abduct, gani tatlo sini ka mga opisyal ang ginpasakaan sang kaso. Sanday major general Jovenal Narcise, commanding general sang 3rd Infantry Division, Col. Renato David, 301st Brigade commander kag Col. Mariano Perez Jr., military intelligence battalion commander. Ginapasaka Martes sang hapon ang kaso sa regional trial court clerk of court kag nagalaum nga sa madali nga tion makita ang lawas sang duha ka mga gin-abduct. Una na nga ginapanginwala sang militar ang ila kahilabtanan sa natabo nga pag-abduct kanday Dominado kag Arado subong man ang pagluthang kay Jose Ely Garachico. Hinoon, bukas kuno ang 3rd Infantry Division sang Philippine Army sa tanan nga invistigasyun kag kaso nga igapatung sa ila pareho sang writ of habeas corpus nga ginapangayo sang abogado nanday Arado kag Dominado batuk sa militar. Pero ginklaro sang mga militar nga wala man sang ebedensya ang utod kag asawa sa mga ginpang-abduct nga magtudlo sa ila nga amo ang nag-abduct sa duha. Sa karon nagaplano ang militar sa pagpasaka sang kaso batuk sa grupo ni Aurelio “Boy" Bosque nga nagpinalagpat kuno tudlo sa ila nga amo ang nag-abduct sa duha bisan pa nga wala sang ebedensya. Sa nauna nga imbestigasyon sang Oton police nagasakay sa Mitsubishi L200 pick-up si Jose Ely Garachico nga mas kilala sa hayo nga Leeboy, may mata-as nga posisyon sa grupo nga Karapatan, upod kanday Nilo Arado, tagpamuno sang Bayan-Panay kag Luisa Posa Dominado sang Selda-Panay halin sa probinsya sang Antique. Pag-abot sa banwa sang Tigbauan diri na nila natalupangdan nga may nagasunod nga isa ka van nga may plate number FVF 463. Pag-abot sa Cabanbanan, Oton, diri na natabo ang pagluthang kay Leeboy kag pag-abduct kay Nilo arado kag Luisa. -Ratsada