Helicopters sa PAF grounded

Grounded una karon ang 41 ka mga helicopters sa Philippine Air Force human sa trahedya sa dakbayan sa Lapu-Lapu Sabado sa hapon. Nahagsa ang usa ka Huey helicopter sa PAF nga hinungdan sa pagkakalas sa kinabuhi sa siyam ka mga tawo. Sa Pasiunang pakisusi, tabanog ang gitumbok nga hinungdan pagkahagsa sa helicopter. Awhag sa kadagkuan sa PAF nga grounded una ang ilang helicopters samtang dili pa mahuman ang pakisusi. Labot niini, ilang gihangyo sa local government unit nga idili ang pagpalupad og mga tabanog duol sa mga tugpahanan kay usa kini sa hinungdan sa pagkahagsa sa mga helicopter. Wa silay nakitang problema sa helicopter ug sa piloto kay bag-o ang nahagsa nga helicopter ug hanas na ang piloto. Hinoon, gihatagan sa kadagkuan sa PAF og financial assistance ang mga kabanay sa namatay ug sa mga naangol sa aksidente. –Balitang Bisdak