4 ka kaso vs Cong. Claude Bautista gitun-an sa DOJ

Upat ka kaso ang gitan-aw nga isang-at sa Department of Justice (DOJ) panel of state prosecutors batok kang Congressman Claude Bautista labot sa kasong pagpatay sa mag-amahang Sarmeinto sa Malita, Davao del Sur. Si city prosecutor Raul Bendigo ang nakadawat sa letter of request sa pamilyang Sarmiento nga pagunitan sa DOJ ang kaso. Ang ginatan-aw nga hinungdan sa pagbalhin sa kaso sa kauluhan mao nga basin kuno’g mamiligro ang mga testigo sa mga Sarmiento. Samtang karon mitumaw ang perception nga basin dunay pressure sa provincial government sa Davao del Sur hinungdan nga ipabalhin ang kaso. Duha ka mga panel of state prosecutor gikan sa DOJ ang moanhi sa dakbayan nga moimbestiga sa kaso. Upat ka mga matang sa kaso ang posibleng isang-at batok sa kampo ni Congressman Bautista ang pili-an sa state prosecutors. Kini mao ang murder-homicide, homicide-homicide, homicide-self defense ug 2 murder cases. Ang pagpili sa kaso subay sa mga makalap nga ebidensya sa mga imbestigador. Gikaingong ang duha ka murder cases maoy hustong termino inay nga double-murder case tungod kini mao man ang pagpatay sa duha ka tawo sa managlahing bala ug pusil. Samtang ang double-murder case mao ang pagpatay sa usa ka tawo ug ang pagkadamay sa usa gamit ang usa lamang ka bala ug pusil. Apan wala usab gipadaplin sa state prosecutors ang ikalimang desisyon nga basin ma-dismiss ang kaso. Hinoon, ang desisyon mag-agad gayud sa panel of state prosecutors. Daghang anggulo ang migawas sa pagpatay kang mayoral bet Isidro Sarmiento ug ang anak niini nga si Danilo Sarmiento diha mismo sa gawas sa ilang balay sa Poblacion, Malita. Sa blotter sa Malita Police, migawas nga misulong si Congressman Bautista kauban ang lima ka bodyguards sa balay sa mga Sarmiento. Apan gi-unahan kuno ang grupo ni Bautista pagpusil hinungdan nga mibalos kini. Pagkadungog sa buto sa pusil, giingong nigawas sa balay ang amahang Sarmiento. Nahimo pa kuno niining mamusil, gani nasamdan pa ang usa sa bodyguard ni Bautista. Na-recover sa mga operatiba ang pipila ka basiyo sa .45 caliber pistol, mga buhing bala ug usa ka super .38 caliber pistol diha kuno kilid sa patayng lawas ni Isidro. - Testigo