‘Nasyonalismo apektado sa media, Internet, uban pa'

Atol sa ika-109 nga kasumaran sa deklarasyon sa Independence Day, gipadayang ni Department of Education city school division superintendent Norma Rances nga apektado ang kaamguhan sa kasaysayan sa mga estudyante tungod sa inpluwensya sa media, internet ug uban pa. Hinoon, gikaingong gipaningkamutan sa mga magtutudlo nga mapabilin ang pagtamod sa mga tinun-an sa kabililhon sa nasyonalismo. Gisaulog sa mga mag-uuma ang adlaw sa pagdeklara sa kaugalingnan pinaagi sa usa ka rally-protesta atubangan sa buhatan sa Department of Agrarian Reform. Alang kanila nagpabilin silang binilanggo sa kalisud hangtod karon. Managlahi man ang opinyon apan usa lang ang gibugtaw sa tanang mga Pilipino: Ang pagkalingkawas sa mga problema sa nasod. Kini, matod pa nila, ang tinood nga Independence Day. Sa laing bahin, yano lang ang pagtimaan sa dakbayan sa Sugbo ug sa Mandaue sa ika-109 nga kasumaran sa Independence Day. Sa Cebu City, gibuksan ang kasaulogan sa usa ka santos nga misa. Adunay gipalupad nga mga balloon nga susama’g rosaryohan human sa santos nga misa. Apan alang kang Mayor Tomas Osmeña, wa pay matuod nga kagawasan nga na-angkon sa nasud. Usa sa iyang gihimong basihan mao ang padayon nga pagsandig sa kagamhanang lokal sa kauluhan, maka pahigayon lamang og mga proyekto. Matod niya, wa gihapo’y kagawasan ang mga lokal nga kagamhanan nga mohimo ug lakang tungod kay gihuptan gihapon ang gahum nasudnong kagamhanan. Samtang sa dakbayan sa Mandaue, gipahigayon ang flag-raising ceremony alas sietebuntag sa Martes. Gisunod usab ang flower offering sa monumento sa nasudnong bayani nga si Dr. Jose Rizal. Gihimong ehemplo ni acting Mayor Amadeo Seno ang milabayng piniliay nga timaan sa na-angkong kagawasan sa nasud. Nanghinaot hinoon ang out-going mayor nga maghiusa ang mga opisyal sa dakbayan human gilangkuban sa partido nga kaatbang ni mayor-elect Jonas Cortes ang konseho. - GMANews.TV