Linog mitay-og sa Cebu, mga lungsod sa Southern Leyte

Intensity-2 nga linog nitay-og sa Cebu City, samtang intensity 6 ang nahiaguman sa ubang mga lugar sa Eastern Visayas, pasado alas-10 sa gabii, Huwebes. Gitay-og usab sa maong linog ang Tacloban City. Gikatahong sa St. Bernard, Southern Layte, nag-panic ang mga lomolupyo sa daplin sa mga baybayon tungod sa kahadlok nga motumaw ang tsunami. “Nag-panic ang tawo sa linog ilabi na coastal area sa kahadlok nga motumaw ang tsunami ug nagbrown out usab, hinoon walay grabe’ng damage ug back to normal na ang sitwasyon," matud pag ni Mayor Rico Rentuza sa St. Bernard. Gikatahong tectonic ang origin sa linog nga ang epicenter 42 kilometros sa amihanang-sidlakan sa Maasin Southern Leyte. Intensity 6 ang kinakusgang natala sa Philippine Institute of Volcanology and Seismology (Phivolcs) nga nitay-og sa St. Bernard, San Francisco, ug San Juan sa Southern Leyte. Intensity 5 ang nahiaguman sa Hinduyanan, Silago, Hinunangan, ug Maasin. Intensity 4 sa Surigao City, ug intensity 3 sa Palo, Leyte. Nakatala ang Phivolcs og duha ka aftershocks. Mahinumdumang nahitabo ang landslide tragedy sa St. Bernard diin ang tibook baranggay Guinsaogon natabunan sa yuta lakip na ang mga tawo. Landslide Sa laing bahin, gipasidan-an sa Mines and Geo-sciences Bureau (MGB) Region 7 ang mga lomolupyo sa bukirang dapit sa sugbo nga magbinantayon sa kinalit nga landslide. Gitumbok sa MGB 7 ang pag-uwan-uwan nga maoy hinungdan sa pagdahili sa yuta. Giawhag ni MGB director Edgar de Dios ang mga lomolupyo sa mga giingong landslide-prone area nga motawag sa ilang buhatan aron ilang masusi ang dapit. Iyang gi-angkon nga tungod sa kadaghang bukirang dapit sa sugbo, dili nila ma-atubang ang pagsusi sa tanang dapit. Nimando usab ang MGB 7 nga dili na pasudlan ang Mangitngit Falls sa lungsod sa Carmen aron malikayan ang susamang insidente nga nahitabo niadtong nilabayng semana. Duha ang nakalas samtang 13 ang na-angol dihang nidahili ang nag-umbaw nga pangpang padung sa maong busay. - Balitang Bisdak