DOH-7 milihok pagbawi sa milk products sa Wyeth

Misugod na sa pagsusi sa mga tindahan ang Department of Health Region 7 human madawat niini ang advisory gikan sa DOH national labot sa pag-recall sa mga produktong gatas sa Wyeth Philippines. Pito ka mga milk products sa naasoyng kompanya nga gigama petsa-8 sa Mayo hangtod petsa-26 sa Hulyo ang gipabawi. Lakip usab nga gipabawi ang mga gatas nga gigama niadtong petsa-8 sa Marso nga dunay parent lot number 6-13034. Ang mga produktong gatas nga gipabawi gilangkuban sa Bonna, Bonamil, Bonakid, Promil, Promil Gold, Promil Kid, ug Progress Gold. Gitug-an ni Dr. Angelita Salarda, hepe sa health regulation cluster, nga delikado sa panglawas sa mga bata ang naasoyng mga milk products. Awhag ni Dr. Salarda sa publiko nga makapalit sa naasoyng mga gatas nga motaho dayon sa ilang buhatan, o sa Wyeth. Mahimo usab sila nga motaho sa GMA 7 Cebu sa 231-48-20. Pabiling gibarugan sa Wyeth Philippines nga dili makadaut sa panglawas sa mga bata ang naasoyng mga gatas. - Balitang Bisdak