Pasiaw sa bomba mibalda sa usa ka flight

Nabalda ang flight FJ 192 sa usa ka commercial airline paingon sa Iloilo City buntag sa Martes human nipasiaw ang usa ka negosyanteng pasahero nga dunay bomba ang bag na iyang gidala. Ipabutang na unta ni Dianne Magtulis, flight attendant, ang bag ni Marcelo Galang, 57, usa ka negosyante nga adunay address sa Quezon City, sa overhead bin dihang nipasiaw kini nga adunay bomba ang iyang bag. Tungod sa binuang, gipakanaog hinoon ang mga pasahero ug gipahiling pagbalik ang mga bagahe sa mga sakop sa Special Weapons and Tactics ug sa bomb-sniffing dogs aron masiguro nga luwas gyud ang tanan. Gidala si Galang sa buhatan sa airport police aron sukit-sukiton sa iyang gihimo. Hinoon, niangkon si Galang nga nipasiaw siya labot sa bomba. Dili kini ang unang higayon nga adunay pasahero nga nagbinuang nga nagdala og bomba nga gikabalda usab sa mga flight. Giawhag sa tanang mga pasahero si Captain James Beloy, hepe sa intelligence and investigation sa airport police, nga likayan ang pasiaw aron dili mabalda ang biyahe. - Balitang Bisdak