61 ka tawo nalanag sa nakaong gulay sa Comval

Mokabat sa 61 ka mga estudyante, ginikanan ug teachers sa barangay Dumlan, Maco, Compostela Valley, nangalanag atol sa ilang nutrition-month feeding niadtong Miyerkules. Skedyul sa feeding program sa Grade-5A pupils sa Dumlan Elementary School atol sa ilang nutrition month. Gipangunahan sa mga ginikanan sa mga estudyante ang pagluto og tinunuang gulay. Human nangaon sa ilang giluto, kalit na lang nga nisakit ang tiyan sa 49 ka mga estudyante, 5 ka ginikanan ug pito ka mga teacher nga nakakaon sa maong gulay. Daling gidala sa Davao Regional Hospital sa Tagum ang mga biktima. Food poisoning ang gidudahan sa mga kawani sa hospital nga hinungdan sa pagkalanag sa mga biktima. Busa, gilayong gipasusi sa Bureau of Food and Drugs (BFAD) sa rehiyon ang gulay nga nakaon sa mga pasyente. Nahibal-ang si Virgilia Boctot ang usa sa nagluto sa gulay ug labing-naapektuhan sa pagkalanag. Nitumaw sa pakisusi nga inay asin ang ibutang sa pagkaon, oxalic acid kon pampaputi sa mga labhanan ang nasagol sa tinunuang gulay. Apan dili katuo ang usa ka titser niini tungod kay wala kuno sila mag-stock ug oxalic acid sa ilang classroom. Sumala sa attending physician, dunay mga timailhan nga nakakaon og oxalic acid ang mga pasyente, hinungdan sa ilang pagkalanag. Apan matino lamang ang tinuod nga hinungdan sa insidente human sa eksaminasyon sa food sample nga himuon sa BFAD. Bisan duna pay pipila nga nabilin pa sa hospital, gideklarar sa doctor nga luwas na ang ilang kahimtang. - Testigo