Grace-Chiz tandem, nanguna sa pinakabagong survey ng Pulse Asia

 

Nanguna ang tambalan ng independent candidates na sina Senador Grace Poe at Francis Escudero sa pinakabagong survey ng Pulse Asia para sa pambansang halalan sa darating na Mayo.

Ayon sa Pulse Asia, ang survey ay ginawa mula Enero 24 hanggang 28, at mayroong 1,200 respondents na pawang mga botante.

Sa mga kandidatong pangulo, nanguna si Poe na mayroong 30 porsiyento, at sumunod na sina Vice-President Jejomar C. Binay (23%), dating interior secretary Manuel A. Roxas II (20%), Davao City Mayor Rodrigo R. Duterte (20%), at Sen. Miriam Defensor Santiago (4%).

Tumaas ng siyam na puntos si Poe mula sa survey noong Disyembre, at naunahan niya si Binay na nawasan naman ng 10 puntos.

VP race

Sa labanan sa pagka-bise presidente, nangunguna pa rin ang running mate ni Poe na si  Sen. Francis "Chiz" Escudero na may 33 porsiyento.

Sumunod naman sina Sen. Ferdinand Marcos Jr. (23%), Camarines Sur Rep. Maria Leonor "Leni" Robredo (18%), at Sen. Alan Peter Cayetano (14%).

Mayroon namang limang porsiyento si Sen. Gregorio Honasan at apat na porsiyento naman si Sen. Antonio Trillanes IV.

Sa isang pahayag, nagpasalamat si Poe sa resulta ng survey.

"The latest Pulse Asia survey is both overwhelming and humbling. It echoes the voice of the people who trust and believe in my capacity to be a leader no matter what hurdles are thrown my way," anang senadora.

Dagdag pa niya, "The Filipinos will always be my inspiration to stay the course and work harder, especially now that the official campaign period is about to commence. I am ready to serve and work to bring the change that the Filipinos deserve."-- FRJ, GMA News