Kampo ni Roxas, ‘di kombinsido sa survey ng SWS gamit ang cellphone

Hindi kombinsido ang kampo ni administration presidential bet Mar Roxas sa resulta ng mobile survey ng Social Weather Station (SWS) para sa mga kandidatong pangulo na nagpapakita ng kalamangan ni independent presidential candidate Sen. Grace Poe.

“I think it’s a survey through mobile phones. It’s not reflective of the real score. Let’s wait for the actual scientific traditional survey,” saad sa text message sa GMA News Online ni Caloocan Rep. Edgar Erice, Liberal Party political affairs head, nitong Biyernes.

Sa 1,200 mobile respondents, 806 ang tumugon sa survey na ginawa matapos ang ikalawang PiliPinas Debates 2016 nitong Linggo sa Cebu. Sa naturang bilang, lumitaw na 35 porsiyento ang pumili kay Poe na nais nilang maging susunod na lider ng bansa.

Pumangalawa naman si Davao City Mayor Rodrigo Duterte na nakakuha ng 26 percent, at sumunod sina Vice President Jejomar Binay (18 percent), Roxas (17 percent), at Senator Miriam Defensor Santiago (2 percent).

Isang porsiyento ng mga respondent ang hindi pa nakapipili ng kanilang iboboto.

Ikinatuwa naman ng kampo ni Poe ang resulta ng survey na mayroong margin of error na ±3 percent para sa national percentages, at ±7 percent naman sa Metro Manila, rest of Luzon, Visayas at Mindanao.

“Our voting public who watched saw the puso in Senator Poe's answers last Sunday, the very same puso that she will use in governing if given the chance to become President of our Republic,” ayon sa pahayag ni Valenzuela Mayor Rex Gatchalian, tagapagsalita ni Poe. -- FRJ, GMA News