3 ka mga pulis sa Cebu ‘makasuhan’ og kinap for ransom

Tulo ka mga pulis sa Vice-Control Section sa Region 7 posibleng makasuhan og kidnap for ransom (KFR) tungod sa gihimo nila ngadto kang Reuel Lerio. Matod sa biktima, gitanggong siya og mga pito ka oras sa grupo nila ni SPO1 Jaime Otadoy una pa buhii. Base as nakuhang impormasyon sa National Bureau of Investigation Region 7 gikan kang Lerio, gibuhian lamang siya human mahatagig P200,000 ang suspek nga mga pulis. Gibutyag sa NBI-7 nga ang maong paagi sa pangikil mamahimong mapasakaan og kasong kidnap for ransom. Ang kidnap-for-ransom case wa hinoon maapil sa ilang ipasakang kaso batok nila ni SPO1 Otadoy, PO1 Raniel Capangpangan ug PO2 Rey Albotra. Giagad sa mga otoridad ang gipanumpaang pamahayag nga giluwatan ni Lerio ug mga sa saksi. Gawas sa extortion nga kaso, giapil ang kasong robbery kay gikuha ang mahalong relo ug cellular phone ni Lerio. Gibuhian sa mga pulis ang usa ka suspek nga si PO3 Milo Arriola tungod kay way igong ebidensyang angay kini kasuhan, bisan pa man sa pag-panghilabot niini sa ilang entrapment operations. Hepe giimbestigahan Human giwagtang ang vice control section sa Cebu City Police Office (CCPO) tungod sa kasong pagpangilkil sa mga sakop niini, Insp. Wilbert Parilla, hepe sa maong buhatan, gipaubos usab sa imbestigasyon. Si Parilla temporaryong gipaubos sa buhatan sa Cebu City director samtang gi-imbestigar pa kini. Matod ni Supt. Paul Labra, deputy city director for operations sa CCPO nga adunay tulubagon si Parilla sa binuhatan sa iyang mga tawo. Si Parilla nahimong hepe sa vice control section tulo ka buwan pa lamang. Hinoon, duna nay mga taho nga nadawat ang CCPO kabahin sa mga ilegal nga kalihukan sa mga sakop sa naasoyng grupo, apan way pormal nga misang-at og reklamo. Gisuwayan pagkuha og reaksyon si Parilla apan miingon nga aduna pa siyay importanteng lakaw. - Balitang Bisdak