Duterte, nangunguna sa trust at performance ratings —Pulse Asia

Nangunguna si Pangulong Rodrigo Duterte as performance at trust ratings sa tatlong pinakamataas na mga opisyal ng pamahalaan, ayon sa survey ng Pulse Asia.

Ipinakita sa resulta ng pinakabagong survey ng Pulse Asia na isinapubliko nitong Biyernes, na nakakuha si Duterte ng 86-percent approval rating. Aabot naman sa 11 percent sa mga respondent ang "undecided" at 3 percent ang nagpahayag ng "disapproval."

Gayundin, ang "trust rating" ni Duterte ay 86% na tinagurian ng Pulse Asia na "big trust," 11% ang undecided, at 3% ang umano'y may "small and/or no trust."

Isinagawa ang survey mula September 25 hanggang October 1 na may 1,200 na adult respondents. May ± 3 percent error margin at 95-percent confidence level ang survey.

Samantala, nakakuha naman ang dalawa pang pinakamatataas na opisyal ng bansa ng ratings na mas mababa kumpara sa ratings ni Duterte. 

• Vice President Leni Robredo - 66% aproval rating, 24% undecided, at 9% disapproval rating; 65% trust ("big trust"), 24% undecided; at 10% small and/or no trust.
• Senate President Aquilino "Koko" Pimentel III - 61% approval rating at 55% trust rating ("big trust").

Ayon sa Pulse Asia, ang respondents ay may "100 percent awareness" kapwa kay Duterte at Robredo, at may "99 percent awareness" kay  Pimentel. — LBG, GMA News