4 ka tawo napaig sa sunog sa Lapu-Lapu City

Upat ka membro sa usa ka panimay napaig sa sunog sa barangay Looc, Lapu-Lapu City, Biyernes sa kaadlawon. Dili pa madawat ni Jonathan Flores nga wa na ang iyang asawa ug tulo sa upat niya ka mga anak. Didto pa sa iyang trabaho sa Mactan Export Processing Zone si Jonathan atol sa sunog. Pag-uli niya sa ilang bay, nangapaig na ang iyang mga mahal sa kinabuhi. Ang mga namatay mao ang asawa nga si Mercedita Calago-Flores, 36; ang ilang mga anak nga sila Jade Laurence, 14, Harold Philip 8, ug Loyd Jennel, usa pa ka tuig. Bugtong naluwas sa magsuon si Jessa Mae, 10, ug ang katabang nga si Sheryl Catausan, nga mga paso lamang ang nahiaguman. Matud ni Jessa Mae, wa siya kahibaw giunsa niya paggawas sa nasunog nga panimay. Matud sa mga bombero, pag-abot nila sa lugar, dili na sila makasud sa panimay tungod sa kadako na sa kayo. Gisubay pa sa mga otoridad ang hinungdan sa maong trahedya, matud ni SFO1 Atilano Berido Jr, chief investigator sa Lapu-Lapu Fire Station. - Balitang Bisdak