Bag-o nga anomaliya sa hudikatura sa Sugbo nabutyag

Daw wa nay paghunong ang mga anomaliya sud sa hudikatura sa probinsya sa Sugbo nga sunud-sunod nga nabutyag. Natay-og na usab ang mga haligi sa hustisya sa pagkabutyag bag-o lang sa anomaliya sa Regional Trial Court (RTC) Branch 59 sa dakbayan sa Toledo. Gikaingong ang huwes, nga maoy petitioner, mao ra usab ang nipirma sa iyang order. Dihang gisugdan sa Korte Suprema ang paghimog pakisusi sa sunud-sunod nga mga anomaliya sa hudikatura, nidaghan na usab ang niyagyag sa publiko sa ilang mga reklamo. Ang labing ulahing anomaliya nga nakuha sa Balitang Bisdak mao kning petition ni Judge Gaudioso Villarin alang sa pag-usab sa entry sa marriage certificate tali niya ug ni Fulgencia Aninon. Ang petition gipaagi sa iyang legal counsel nga si Atty. Elpidio Benjamin Noel. Si judge Villarin mao ra usab nipirma sa iyang order niadtong petsa-20 sa Hulyo 2006. Gusto ni Sonia (dili tinuod nga pangalan) mahunong na ang illegal nga kalihukan sa mga huwes. Karong Biyernes gipaabot nga tapuson na ni Atty. Rullyn Garcia ang iyang gihimong pakisusi sa annulment cases sa RTC sa dakbayan sa Toledo. Una nang nataho ang ubang anomaliya nga maoy hinungdan sa imbestigasyong gipahigayon sa Supreme Court.- Balitang Bisdak