Police ginpusil patay sang isa ka airport guard

Isa ka police officer ginpusil patay sang isa ka body guard sa air transportation office (ATO) sa Iloilo City, Lunes sang gab-i. Napatay sa ospital si SPO1 Oscar Salanatin, 53, miembro sa Criminal Investigation and Detection Group (CIDG), sa pagpangtiro sang suspek nga si Danilo Alcaryoto, body guard ni ATO manager Allan Java. Natabo ang pangtiro sa Escarilla Subdivision, Mandurriao, Iloilo City, Lunes sang gab-i. Suno sa himata ni Salanatin, nagainum-inom ang biktima sa kamalig sa higad sang dalan sang naglabay ang suspek kaupod ang isa ka lalaki kag ila gin bugno kag didto nagluntad ang indi pag-intindihanay tubtub naglab-ot sa punto nga pangluthang. Gilayon gindala ang biktima sa Western Visayas Medical Center bangud sa naangkon nga kasamaran sa likod, paa kag kamot. Nakit-an sang mga pulis sa lugar nga natabu-an ang lima tanan ka empty shells kag isa ka slug sang .45 caliber pistol. Kritikal ang kondisyon ni Salanatin sang gindala ini sa Iloilo Saint Paul’s Hospital mga alas-10 kagab-i. Apang Martes sang aga, ginbawi-an ini sang kabuhi. Ni-surrender na ang upod sang suspek nga si Donoban Catalan. Lunsay nagatrabaho bilang mga blue guard sa ATO office sa Iloilo airport si Catalan kag si Alcaryoto. Ginsugat Martes sang aga sa mga sakop sa National Bureau of Investigation (NBI) si Catalan sa Villa Carolina Arevalo matapos ini magdesidir nga magsurender. Panaysayon ni Catalan sa Ratsada, nagalakat siya kag si Alcaryoto pakadto sa ila abyan. Naka-una kuno ini sa kay Alcaryoto kag ginkakibot na lang nga nagabina-isay na sa likod ang suspek kag biktima. May pilas man sa wala nga batiis si Catalan, gani matapos ginpa-idalum sa paraffin test sang NBI para matul-id kun bala na-igo man ini sang armas luthang. Indi kuno kilalahay ang biktima kag ang suspek. Hambal ni Catalan, antes ginhampak ni Alcaryoto sang bag ang biktima, ginpahayag nga ginsita ni Salanatin si Alcaryoto nga tagu-taguon ang nagakawal sini nga armas. Magluwas kay Catalan nga nagpahayag na nga ang iya gid man upod kagab-i nga si Alcaryoto amo ang nagtiro kay Salanatin, may nakuha pa nga mga witness ang police station five sa lugar sang insidente nga nagapabor sa biktima. Personal man nga na-istorya ni Police Senior Inspector Orly Gabinete si Alcaryoto Lunes sang gab-i. Santo sa inbestigasyon sang Mandurriao police, tanan nga lupok ang naghalin sa armas ni Alcaryoto. Wala na gani makagabot pa sang iya pusil si Salanatin, evidence and supply personnel sang 6th CIDG unit samtang gin-paarakan sang suspek. - Ratsada