Lipatan ng pwesto sa PNP nagsimula na

Labing-isang opisyal ng Philippine National Police ang babalasahin kasunod ng pagreretiro ng 19 na opisyal, kasama na ang limang heneral ngayong Nobyembre. Inihayag nitong Miyerkules ni PNP Directorate for Personnel and Records Management (DPRM) chief Dir. Edgardo Acuña na unang heneral na nagretiro nitong Nob. 5 si Dir. Wilfredo Garcia, dating director for operations. Sinabi ni Acuña na ang balasahan sa matataas na opisyal ngayong buwan ay sinimulan nang umupo si Director Silverio Alarcio Jr. sa binakanteng pwesto ni Garcia. Ngayong Miyerkules ay nagretiro na rin sina Director Ernesto Belen na humahawak sa pwesto ng Directorate for Logistics (DL) at Chief Supt. Edwin Pfleider nakatalaga bilang Police Regional Office 6 (Western Visayas). Sa Huwebes ay nakatakda ring magretiro si Chief Supt. Nicasio Radovan Jr, regional director sa Calabarzon at sa Nov. 14 naman ay aalis na rin si Chief Supt. Orlando Maddela Jr. ng Internal Affairs Services (IAS). Papalit kay Belen si Director Charlemagne Alejandrino. Ang kasalukuyang pwesto ni Alejandrino sa Directorate for Plans ay ipapasa naman kay Chief Supt. Romeo Ricardo, director sa Civil Security Group. Ang DPRM deputy head na si Supt. Ireno Bacolod ang papalit kay Ricardo. Hahalili bilang DPRM deputy si Chief Supt. Sukarno Ikbala, dating deputy for the Directorate for Police Community Relations. Uupo sa mababakanteng pwesto ni Ikbala si Sr. Supt. Roberto Rongavilla na nanunungkulan bilang executive officer of the directorate for operations. Papalit sa kanya si Sr. Supt. Reynaldo Rafal. Si Sr. Supt. Rodolfo Sebastian ang mamumuno sa pwesto bilang deputy for the Police Community Relations Group (PCRG), habang si Sr. Supt. Salvador Manga ang itatalaga bilang pinuno ng Directorial Staff of the Traffic Management Group (CDS, TMG). Sa ibang rehiyon, papalitan ni Chief Supt. Ricardo Padilla si Radovan, habang si Sr. Supt. Paterno Bangui at Sr. Supt. Darius Magallanes Tuazon Jr. ay malilipat bilang deputy directors for administration at operations PRO-6, ayon sa pagkakasunod. Sinabi ni Acuña na anim na iba pang senior superintendents at walong police superintendents ang nasa listahan ng mga magreretiro ngayong buwan. Sa 19 na senior officials na magreretiro, siyam ang mula sa national headquarters, apat sa Calabarzon Police Regional Office, dalawa sa PRO6 at dalawa sa PRO2. - Fidel Jimenez, GMANews.TV