Lawas sa batang naghikog sa Davao gipa-exhume

Gi-exhume Huwebes sa buntag ang lawas ni Mariannet Amper, 12-anyos, nga naghikog sa Maa, Davao City aron ipa-autopsy. Nalimin sa mga pagduda ang pagpakamatay sa bata human ikataho nga dunay mga garas ang kinatawo niini. Mismong ang medico-legal doctor ang nangunay sa paghiling sa lawas ni Mariannet ug karong Huwebes gilaumang matapos ang autopsy. Ipahibalo sa Biyernes ang resulta sa eksaminasyon nga mopatin-aw unya sa mga pagduda. Namatikdan sa GMA Testigo nga walay ni bisan usa sa mga kabanay ni Mariannet ang nipakita sa Maa Public Cemetery atol exhumation. Sumala sa mga pulis, ang autopsy maoy mobugto sa duda nga may foul play luyo sa paghikog ni Mariannet. Gawas sa resulta sa autopsy, basehan usab ang pisi, diary ug uban pang circumstantial evidence sa imbestigasyon. Andam hinoon nga modawat si Manang Magdalena, inahan ni Mariannet, sa unsa mang resulta sa autopsy. Gilubong niadtong Sabado, petsa-10 sa Nobembre si Mariannet, nga nagpakamatay niadtong petsa-2 tungod sa tumang kakabos. Pero may mga pagduda kung unsa gyuy tinuod nga hinungdan sa paghikog sa bata. Nihapahigayon og pagduki-duki ang mga sakop sa Department of Social Welfare and Development sa Southern Mindanao. Usa ka grupo niini gipahimo og interviews sa mga silingan, teacher ug mga higala sa bata. Pito ka magsoon sila si Mariannete. Siya maoy usa sa duha nga nahibilin sa poder sa iyang mga ginikanan tungod kay nangaminyo na ang uban. Gipa-exhume ni Davao City Mayor Rodrigo Duterte ang lawas sa bata aron ipa-autopsy. Gusto sa mayor nga mahibaloan kung unsa gyuy nagtukmod sa bata nga maghikog. Pinaagi niini, matod sa mayor, mahibaloan sa kagamhanan sa Davao kung diin sila nagkulang. - Testigo/GMANews.TV