Tag-iya sa bangka nga nalunod sa Cebu gibasol

Gibasol sa mga kabanay sa mga namatay sa pagkalunod sa MV Ave Maria ang tag-iya sa pump boat ug ang Philippine Coast Guard. Dili madawat sa pamiyang Maranian ang gidangatan sa ilang mga ginikanan. Ang magtiayong Victoria, 84, ug Magdalino, 85, nakalas dihang nalunod ang pump boat nga ilang gisakyan didto sa kadagatan sa Camotes, Cebu. Nisamot ang pagbangutan sa banay kay hangtod karon missing pa gihapon ang ilang anak nga si Lito Maranian, 52. Niadtong Merkules sa hapon nabanglan sa kadagatan sa Kaubian Island ang lawas ni Catalina Bitog, laing pasahero sa MV Ave Maria. Gipadayag sa mga pamilya sa nangamatay nga kon na-rescue unta dayon ang mga pasahero hayan buhi pa ang ilang mga mahal sa kinabuhi. Tulo na ang kumpirmadong namatay sa naasoyng trahedya ug ang duhang gikatahong kritikal ang kaimtang anaa pa sa hospital. Madumdumang pasado alas-10 sa gabii niadtong Martes nakadangat sa buhatan sa naval forces ang survivors sa nalunod nga pump boat human sila maluwas sa mga sakop sa Philippine Navy. Nigikan ang MV Ave Maria 5 sa pantalan sa siyudad sa Mandaue mga ala-una sa hapon. Padung sa Poro, Camotes, luwan ang 43 ka mga pasaheo. Giangkon sa rescuers nga naglisod sila sa ilang operasyon gumikan sa kadagko sa mga bawod. Gikaingong dagko kayo ang mga bawod nga sunud-sunod nga nihapak sa pump boat hinungdan nga nabuslot ang kilid niini. Nisabaw ang tubig nga nakalunod sa bangka. May karga nga mga sinakong bugas, abono ug uban pang mga kargamento ang pump boat. Nalunod ang sakayan mga alas-4:30 sa hapon, 30 minutos sa dili pa ang gitakda nga pagdunggo niini sa pantalan sa Poro. - Balitang Bisdak